سیدنا ابن عباس رضی اللہ عنہما کے پاس ایک اعرابی آیا اور کہا: میں نے اپنی بیوی کو اپنے اوپر حرام کیا ہے۔ سیدنا ابن عباس رضی اللہ عنہما نے فرمایا: ”وہ تم پر حرام نہیں۔“ اعرابی نے کہا: کیا اللہ نے قرآن میں نہیں فرمایا: «كُلُّ الطَّعَامِ كَانَ حِلًّا لِبَنِي إِسْرَائِيلَ إِلَّا مَا حَرَّمَ إِسْرَائِيلُ عَلَى نَفْسِهِ» ؟ سیدنا ابن عباس رضی اللہ عنہما ہنسے اور فرمایا: ”تمہیں کیا معلوم اسرائیل نے اپنے اوپر کیا حرام کیا تھا۔“ پھر لوگوں سے فرمایا: اسرائیل (یعقوب علیہ السلام) کو عرق النساء کی بیماری ہوئی تھی تو انہوں نے نذر مانی کہ اگر اللہ نے انہیں شفا دی تو وہ کسی نس ندی کا گوشت نہ کھائیں گے۔ اس لیے یہودی گوشت سے نسیں نکالتے ہیں۔ [سنن سعید بن منصور/كتاب الطلاق/حدیث: 2861]