سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”ہر پیدا ہونیوالا بچہ فطرت پر پیدا ہوتا ہے، لیکن اس کے ماں باپ اسے یہودی یا عیسائی یا مجوسی بنا دیتے ہیں۔“
(امام ابن حبان رحمہ اللہ فرماتے ہیں:) نبی اکرم صلی اللہ علیہ وسلم کا یہ فرمان: ”ہر پیدا ہونیوالا بچہ فطرت پر پیدا ہوتا ہے۔“ اس سے مراد یہ ہے: وہ اس فطرت پر پیدا ہوتا ہے جو فطرتاللہ تعالیٰ نے اس دن مقرر کی تھی، جب ان لوگوں کو سیدنا آدم کی پشت سے نکالا تھا۔ اس کی دلیلاللہ تعالیٰ کا یہ فرمان ہے: ”اللہ کی (مقرر کردہ) وہ فطرت جس پر اس نے لوگوں کو پیدا کیا ہے تو اللہ کی تخلیق میں کوئی تبدیلی نہیں ہوتی۔“ وہ یہ فرماتا ہے: اس خلقت میں کوئی تبدیلی نہیں ہوتی، جس کے لئے اس نے ان لوگوں کو پیدا کیا ہے، خواہ وہ جنت کے لئے، خواہ جہنم کے لئے ہو، اس وقت جب اس نے انہیں سیدنا آدم علیہ السلام کی پشت سے باہر نکالا تھا، اور یہ فرمایا تھا: یہ لوگ جنت کے لئے ہیں اور یہ لوگ جہنم کے لئے ہیں۔ کیا آپ نے غور نہیں کیا: سیدنا خضر علیہ السلام نے جس لڑکے کو قتل کر دیا تھا اس کے بارے میں نبی اکرم صلی اللہ علیہ وسلم نے یہ فرمایا تھا: ”اللہ تعالیٰ نے اسے فطری طور پر کافر بنایا تھا۔“ حالانکہ وہ مؤمن ماں باپ کے درمیان تھا تواللہ تعالیٰ نے اپنے بندے سیدنا خضر علیہ السلام کو اس بارے میں علم دیا، حالانکہ اس نے اپنے کلیم سیدنا موسیٰ علیہ السلام کو اس بارے میں علم نہیں دیا۔ جیسا کہ ہم اپنی کتابوں میں دیگر مقامات پر اس کی وضاحت کر چکے ہیں۔ [صحیح ابن حبان/كتاب الإيمان/حدیث: 129]