سیدنا براء بن عازب رضی اللہ عنہ بیان کرتے ہیں کہ ایک دیہاتی نبی اکرم صلی اللہ علیہ وسلم کی خدمت میں حاضر ہوا، اس نے عرض کی: یا رسول اللہ! آپ مجھے کسی ایسے عمل کے بارے میں بتائیے جو مجھے جنت میں داخل کر دے۔ نبی اکرم صلی اللہ علیہ وسلم نے ارشاد فرمایا: ”تم نے مختصر الفاظ استعمال کیے ہیں اور بڑی بات دریافت کی ہے، تم جان (یعنی غلام یا کنیز) کو آزاد کرو اور گردن کو چھڑاؤ۔“ اس نے دریافت کیا: یہ دونوں ایک ہی چیز نہیں ہیں؟ نبی اکرم صلی اللہ علیہ وسلم نے فرمایا: ”نہیں، جان کو آزاد کرنے سے مراد یہ ہے کہ تم صرف اسے آزاد کرو اور گردن کو چھڑانے سے مراد یہ ہے کہ تم اس کی قیمت ادا کرو (اور دوسرے شخص کے غلام کو آزاد کر دو)، ایسا عطیہ دینا جو مسلسل جاری ہو اور رشتے داری کے حقوق کا خیال نہ رکھنے والے رشتے دار پر خرچ کرنا، اور اگر تم اس کی طاقت نہیں رکھتے، تو تم بھوکے کو کھانا کھلا دو اور پیاسے کو کچھ پلا دو، نیکی کا حکم دو، برائی سے منع کر دو، اور اگر تم اس کی بھی طاقت نہیں رکھتے، تو تم بھلائی کی بات کے علاوہ اپنی زبان کو روک کے رکھو۔“ [صحیح ابن حبان/كتاب البر والإحسان/حدیث: 374]