سیدنا ابوہریرہ رضی اللہ عنہ بیان کرتے ہیں کہ ایک شخص نبی اکرم صلی اللہ علیہ وسلم کے پاس سے گزرا اور آپ صلی اللہ علیہ وسلم اس وقت ایک محفل میں تشریف فرما تھے، اس نے عرض کی: «سَلَامٌ عَلَيْكُمْ» ”سلام علیکم“، تو نبی اکرم صلی اللہ علیہ وسلم نے فرمایا: ”(اس کو) دس نیکیاں ملیں“، پھر ایک اور شخص گزرا اس نے کہا: «السَّلَامُ عَلَيْكُمْ وَرَحْمَةُ اللّٰهِ» ”السلام علیکم ورحمت اللہ“، تو نبی اکرم صلی اللہ علیہ وسلم نے فرمایا: ”بیس نیکیاں“، پھر ایک اور شخص گزرا اس نے کہا: «السَّلَامُ عَلَيْكُمْ وَرَحْمَةُ اللّٰهِ وَبَرَكَاتُهُ» ”السلام علیکم ورحمت اللہ وبرکاتہ“، تو نبی اکرم صلی اللہ علیہ وسلم نے فرمایا: ”تیس نیکیاں“، پھر حاضرین میں سے ایک شخص اٹھا اور اس نے سلام نہیں کیا، تو نبی اکرم صلی اللہ علیہ وسلم نے ارشاد فرمایا: ”ہو سکتا ہے تمہارا یہ ساتھی (سلام کرنا) بھولا نہ ہو گا، جو شخص کسی محفل میں آئے، تو سلام کرے، اگر اسے مناسب لگے، تو وہاں بیٹھ جائے اور اگر اٹھ کر جانا چاہے، تو پھر سلام کرے، کیونکہ پہلا دوسرے کے مقابلے میں زیادہ حق دار نہیں ہوتا۔“ [صحیح ابن حبان/كتاب البر والإحسان/حدیث: 493]