ابراہیم نخعی بیان کرتے ہیں: اسود بن یزید ایک تاجر سے قرض لیا کرتے تھے جب ان کی تنخواہ آتی تھی، تو وہ ادائیگی کر دیا کرتے تھے۔ اسود نے کہا: اگر تم چاہو، تو میں تمہیں ایک مرتبہ تاخیر سے ادائیگی کروں گا کیونکہ اس مرتبہ اس تنخواہ میں مجھے کچھ دیگر اخراجات بھی پورے کرنے ہیں تو تاجر نے ان سے کہا: میں ایسا نہیں کروں گا تو اسود نے پانچ سو درہم اسے نقد ادا کر دیئے یہاں تک کہ اس تاجر نے وہ اپنے قبضے میں لے لئے تو تاجر نے ان سے کہا: یہ آپ کے حوالے ہیں۔ آپ انہیں لے لیں، اسود نے اس سے دریافت کیا پہلے جب میں نے تم سے یہ درخواست کی تھی، تو تم نے میری یہ بات نہیں مانی تھی تو تاجر نے ان سے کہا: میں نے آپ کو یہ بیان کرتے ہوئے سنا ہے آپ نے ہمیں سیدنا عبداللہ بن مسعود رضی اللہ عنہ کے حوالے سے یہ حدیث بیان کی تھی۔ نبی اکرم صلی اللہ علیہ وسلم نے یہ بات ارشاد فرمائی ہے۔ ”جو شخص اللہ کے نام پر کسی کو دو مرتبہ قرض دیتا ہے تو اسے ان دو میں سے ایک مرتبہ صدقہ کرنے کا اجر ملتا ہے۔“
(امام ابن حبان رحمہ اللہ فرماتے ہیں:) فضیل ابومعاذ نامی راوی فضیل بن میسرہ ہیں یہ اہل بصرہ سے تعلق رکھتے ہیں۔ ابوحریز نامی راوی عبداللہ بن حصین ہیں یہ سجستان کے قاضی تھے اور انہوں نے بصرہ میں حدیثیں بیان کی ہیں۔ [صحیح ابن حبان/كتاب البيوع/حدیث: 5040]