سیدنا انس رضی اللہ عنہ بیان کرتے ہیں: ابوطلحہ نے سیدہ ام سلیم رضی اللہ عنہا کو شادی کا پیغام بھیجا تو انہوں نے جواب دیا: ابوطلحہ آپ جیسے شخص کے پیغام کو مسترد نہیں کیا جا سکتا لیکن میں ایک مسلمان عورت ہوں اور آپ ایک کافر شخص ہیں میرے لیے آپ کے ساتھ شادی کرنا جائز نہیں ہے، اگر آپ اسلام قبول کر لیتے ہیں، تو یہی میرا مہر ہو گا میں اس کے علاوہ کسی چیز کا آپ سے مطالبہ نہیں کروں گی، تو سیدنا ابوطلحہ رضی اللہ عنہ نے اسلام قبول کر لیا پھر سیدہ ام سلیم رضی اللہ عنہا کی رخصتی ہو گئی وہ حاملہ ہو گئیں انہوں نے ایک خوبصورت بچے کو جنم دیا۔ سیدنا ابوطلحہ رضی اللہ عنہ اس بچے سے بہت محبت کرتے تھے کچھ عرصہ بعد وہ بچہ بیمار ہو گیا۔ سیدنا ابوطلحہ رضی اللہ عنہ کو اس کی وجہ سے انتہائی افسوس ہوا، یہاں تک کہ وہ کمزور ہو گئے۔
سیدنا انس رضی اللہ عنہ بیان کرتے ہیں: سیدنا ابوطلحہ رضی اللہ عنہ صبح و شام نبی اکرم صلی اللہ علیہ وسلم کی خدمت میں حاضر ہوا کرتے تھے۔ ایک مرتبہ وہ نبی اکرم صلی اللہ علیہ وسلم کی خدمت میں حاضر ہوئے تو پیچھے بچے کا انتقال ہو گیا۔ سیدہ ام سلیم رضی اللہ عنہا نے اس بچے کو خوشبو لگائی اسے صاف کیا اور اسے ہمارے چھوٹے کمرے میں لٹا دیا۔ سیدنا ابوطلحہ رضی اللہ عنہ گھر آئے اور دریافت کیا: میرے بیٹے کا کیا حال ہے۔ سیدہ ام سلیم رضی اللہ عنہا نے جواب دیا: اچھی حالت میں ہے، جب سے وہ بیمار ہوا ہے آج رات سب سے زیادہ پرسکون ہے پھر سیدنا ابوطلحہ رضی اللہ عنہ نے اس بات پر اللہ تعالیٰ کی حمد بیان کی اور بہت خوش ہوئے پھر سیدہ ام سلیم رضی اللہ عنہا نے ان کے سامنے رات کا کھانا پیش کیا انہوں نے رات کا کھانا کھایا پھر سیدہ ام سلیم رضی اللہ عنہا نے کچھ خوشبو لگائی اور ان کے سامنے آئیں، یہاں تک کہ سیدنا ابوطلحہ رضی اللہ عنہ نے ان کے ساتھ صحبت کر لی جب انہوں نے رات کا کھانا بھی کھا لیا اپنی بیوی سے صحبت بھی کر لی تو سیدہ ام سلیم رضی اللہ عنہا نے کہا: اے ابوطلحہ آپ کی کیا رائے ہے اگر آپ کے کسی پڑوسی نے آپ کو عاریت کے طور پر کوئی چیز دی ہو اور آپ اس سے فائدہ حاصل کرتے رہیں پھر وہ اس چیز کو آپ سے واپس لینا چاہے تو کیا آپ وہ چیز اسے واپس کر دیں گے۔ سیدنا ابوطلحہ رضی اللہ عنہ نے جواب دیا: جی ہاں اللہ کی قسم میں وہ چیز اسے واپس کر دوں گا۔ سیدہ ام سلیم رضی اللہ عنہا نے دریافت کیا: اپنی خوشی کے ساتھ؟ انہوں نے جواب دیا: اپنی خوشی کے ساتھ۔ تو سیدہ ام سلیم رضی اللہ عنہا نے کہا: اللہ تعالیٰ نے میرا بیٹا آپ کو عاریت کے طور پر دیا تھا جب تک اس نے چاہا آپ نے اس سے نفع حاصل کیا پھر اللہ تعالیٰ نے اس کی روح کو قبض کر لیا، تو اب آپ صبر سے کام لیں اور ثواب کی امید رکھیں۔ سیدنا انس رضی اللہ عنہ بیان کرتے ہیں: تو سیدنا ابوطلحہ رضی اللہ عنہ نے «انا لله و انا الیه راجعون» پڑھا اور صبر سے کام لیا، اگلے دن وہ نبی اکرم صلی اللہ علیہ وسلم کی خدمت میں صبح کے وقت حاضر ہوئے اور آپ کو سیدہ ام سلیم رضی اللہ عنہا کے واقعہ کے بارے میں بتایا یعنی جو کچھ انہوں نے کیا تھا، تو نبی اکرم صلی اللہ علیہ وسلم نے ارشاد فرمایا: اللہ تعالیٰ تم دونوں کی گزشتہ رات میں تم دونوں کے لئے برکت رکھے۔
سیدنا انس رضی اللہ عنہ بیان کرتے ہیں: سیدہ ام سلیم رضی اللہ عنہا اس واقعہ سے حاملہ ہو گئیں۔ نبی اکرم صلی اللہ علیہ وسلم نے سیدنا ابوطلحہ رضی اللہ عنہ سے فرمایا: جب ام سلیم بچے کو جنم دے تو اس کے بچے کو میرے پاس لے کر آنا، تو سیدنا ابوطلحہ رضی اللہ عنہ اس بچے کو کپڑے میں لپیٹ کر اسے نبی اکرم صلی اللہ علیہ وسلم کے پاس لے آئے۔ نبی اکرم صلی اللہ علیہ وسلم نے کھجور کو چبایا اور اسے اس بچے کے منہ میں ڈال دیا، پس بچے نے اسے چوسنا شروع کیا، تو نبی اکرم صلی اللہ علیہ وسلم نے سیدنا ابوطلحہ رضی اللہ عنہ سے فرمایا: انصار واقعی کھجور سے محبت کرتے ہیں پھر نبی اکرم صلی اللہ علیہ وسلم نے اس بچے کو گھٹی دی اس بچے کا نام رکھا اس کے لئے دعا کی، آپ نے اس کا نام عبداللہ رکھا۔ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7187]