سیدنا ابن عمر رضی اللہ عنہما سے روایت ہے کہ وہ کسی بھی مجلس میں بیٹھتے، خواہ وہاں کوئی اور ہوتا یا نہ ہوتا، وہ یہ دعا ضرور مانگتے: «اللَّهُمَّ اغْفِرْ لِي مَا قَدَّمْتُ وَمَا أَخَّرْتُ، وَمَا أَسْرَرْتُ وَمَا أَعْلَنْتُ، وَمَا أَنْتَ أَعْلَمُ بِهِ مِنِّي، اللَّهُمَّ ارْزُقْنِي مِنْ طَاعَتِكَ مَا تَحُولُ بَيْنِي وَبَيْنَ مَعْصِيَتِكَ، وَارْزُقْنِي مِنْ خَشْيَتِكَ مَا تُبَلِّغُنِي بِهِ رَحْمَتَكَ، وَارْزُقْنِي مِنَ الْيَقِينِ مَا تُهَوِّنُ بِهِ عَلَيَّ مَصَائِبَ الدُّنْيَا، وَبَارِكْ لِي فِي سَمْعِي وَبَصَرِي، وَاجْعَلْهُمَا الْوَارِثَ مِنِّي، اللَّهُمَّ اجْعَلْ ثَأْرِي مِمَّنْ ظَلَمَنِي، وَانْصُرْنِي عَلَى مَنْ عَادَانِي، وَلَا تَجْعَلِ الدُّنْيَا أَكْبَرَ هَمِّي، وَلَا مَبْلَغَ عِلْمِي، اللَّهُمَّ وَلَا تُسَلِّطْ عَلَيَّ مَنْ لَا يَرْحَمُنِي» ”اے اللہ! میرے وہ گناہ معاف فرما جو میں نے پہلے کیے اور جو بعد میں کیے، جو چھپ کر کیے اور جو علانیہ کیے، اور جنہیں تو مجھ سے زیادہ جانتا ہے، اے اللہ! مجھے اپنی ایسی اطاعت نصیب فرما جو میرے اور تیری نافرمانی کے درمیان حائل ہو جائے، اور مجھے اپنا ایسا ڈر عطا فرما جو مجھے تیری رحمت تک پہنچا دے، اور مجھے ایسا یقین عطا فرما جس کے ذریعے تو مجھ پر دنیا کی مصیبتیں آسان کر دے، میری سماعت اور بصارت میں برکت عطا فرما اور انہیں میرا وارث بنا دے، اے اللہ! میرا بدلہ اس سے لے جس نے مجھ پر ظلم کیا، اور اس کے خلاف میری مدد فرما جس نے مجھ سے دشمنی کی، اور دنیا کو میرا سب سے بڑا مقصد اور میرے علم کی انتہا نہ بنا، اے اللہ! مجھ پر اسے مسلط نہ کر جو مجھ پر رحم نہ کرے“۔ ابن عمر رضی اللہ عنہما سے ان کلمات کے بارے میں پوچھا گیا تو انہوں نے بتایا کہ رسول اللہ صلی اللہ علیہ وسلم اپنی مجلس کا اختتام انہی کلمات پر فرمایا کرتے تھے۔
یہ حدیث امام بخاری کی شرط پر صحیح ہے لیکن شیخین نے اسے روایت نہیں کیا۔ [المستدرك على الصحيحين/كتاب الدعاء والتكبير والتهليل والتسبيح والذكر/حدیث: 1955]