سیدنا انس بن مالک اور سیدنا ابوسعید خدری رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: ”میری امت میں عنقریب اختلاف اور تفرقہ پیدا ہوگا، ایک ایسی قوم ظاہر ہوگی جو باتیں تو بہت اچھی کرے گی مگر ان کے افعال برے ہوں گے، وہ قرآن پڑھیں گے لیکن وہ ان کے حلق سے نیچے نہیں اترے گا، وہ دین سے اس طرح نکل جائیں گے جیسے تیر شکار سے پار نکل جاتا ہے، وہ (دین کی طرف) اس وقت تک واپس نہیں لوٹیں گے جب تک تیر اپنے چلے کی طرف واپس نہ آ جائے، وہ تمام مخلوق اور خلائق میں سب سے بدتر ہیں، طوبیٰ (خوشخبری) ہے اس شخص کے لیے جو انہیں قتل کرے اور جسے وہ قتل کر دیں، وہ اللہ کی کتاب کی طرف بلائیں گے حالانکہ ان کا اللہ کی کتاب سے کوئی تعلق نہیں ہوگا، جس نے ان سے قتال کیا وہ ان کی نسبت اللہ کے زیادہ قریب ہوگا“ صحابہ نے عرض کیا: اے اللہ کے رسول! ان کی نشانی کیا ہے؟ آپ صلی اللہ علیہ وسلم نے فرمایا: ”سر منڈوانا۔“
قتادہ نے یہ حدیث سیدنا ابوسعید خدری رضی اللہ عنہ سے نہیں سنی، بلکہ انہوں نے اسے ابومتوکل ناجی سے اور انہوں نے سیدنا ابوسعید خدری رضی اللہ عنہ سے سنا ہے۔ [المستدرك على الصحيحين/كتاب قتال أهل البغي وهو آخر الجهاد/حدیث: 2682]