سیدنا جابر بن عبداللہ رضی اللہ عنہ فرماتے ہیں: ایک دن تمام قریش جمع تھے کہ آپ کے پاس عتبہ بن ربیعہ بن عبد شمس آیا اور بولا اے محمد صلی اللہ علیہ وسلم ! (آپ بہتر ہیں یا عبداللہ؟ رسول اللہ صلی اللہ علیہ وسلم خاموش رہے۔ آپ نے اس سے کہا: تم (اپنی بات کہہ کر) فارغ ہو چکے ہو؟ اس نے کہا: جی ہاں۔ تو رسول اللہ صلی اللہ علیہ وسلم نے ” بِسْمِ اللّٰہِ الرَّحْمٰنِ الرَّحِیْمِ “ پڑھ کر سورۂ فصلت شروع سے پڑھنا شروع کی اور فَاِنْ اَعْرَضُوْا فَقُلْ اَنْذَرْتُکُمْ صَاعِقَۃً مِثْلَ صَاعِقَۃِ عَادٍ وَ ثَمُوْدَ (فصلت: 13) تک۔ پڑھی (یہ سن کر) عتبہ بولا: بس، بس۔ آپ کے پاس تو اس کے سوا اور کچھ ہے ہی نہیں۔ آپ صلی اللہ علیہ وسلم نے فرمایا: نہیں۔ عتبہ، قریش کے پاس گیا، قریش نے احوال دریافت کیے تو وہ بولا: تم جو کچھ پوچھنا چاہتے تھے، میں وہ سب کچھ وہاں بول کر آیا ہوں۔ انہوں نے پوچھا: کیا اس (محمد صلی اللہ علیہ وسلم ) نے کوئی جواب دیا؟ اس نے کہا: جی ہاں خدا کی قسم! اس نے جو کچھ بھی کہا: مجھے اس کی کچھ سمجھ نہیں آئی سوائے اس کے کہ وہ تمہیں قوم ثمود اور عاد جیسے عذاب سے ڈراتا ہے۔ قریش نے کہا: تیرے لیے ہلاکت ہو، ایک آدمی تیرے ساتھ عربی میں بات کرتا ہے اور تمہیں پتہ نہیں چلتا کہ وہ کیا کہتا ہے۔ اس نے کہا: خدا کی قسم مجھے سوائے ” صاعقہ “ کے ذکر کے اور کسی بات کی سمجھ نہیں آئی۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كتاب التفسير/حدیث: 3039]