سیدنا سعید بن جبیر رضی اللہ عنہ فرماتے ہیں: ایک سال تک میں ابن عباس رضی اللہ عنہما کے پاس مختلف مواقع پر گیا، اس دوران نہ میں نے ان سے گفتگو کی اور نہ انہوں نے مجھے پہچانا۔ پھر ایک مرتبہ ابن عباس رضی اللہ عنہما نے مجھ سے پوچھا: تم کون ہو؟ میں نے کہا: اہل عراق سے ہوں۔ آپ نے پوچھا: کس قبیلے سے تعلق ہے؟ میں نے کہا: بنی اسد سے۔ آپ نے پوچھا: باغیوں میں سے یا ان میں سے جن پر اللہ تعالیٰ نے انعام کیا؟ میں نے کہا: ان میں سے جن پر اللہ تعالیٰ نے انعام کیا۔ آپ نے فرمایا: پوچھو (کیا پوچھنا چاہتے ہو) میں نے کہا: لَآ اُقْسِمُ بِیَوْمِ الْقِیٰمَۃِ (القیامۃ: 1) ” روز قیامت کی قسم یاد فرماتا ہوں۔“ (کا مطلب سمجھنا چاہتا ہوں) آپ نے فرمایا: تمہارا رب اپنی خلق میں سے جس کی چاہتا ہے قسم کھاتا ہے۔ میں نے کہا: وَ لَآ اُقْسِمُ بِالنَّفْسِ اللَّوَّامَۃِ (القیامۃ: 2) ” اور اس جان کی قسم جو اپنے اوپر ملامت کرے۔“ (کا کیا مطلب ہے) آپ نے فرمایا: وہ نفس کی ملامت کی گئی ہے۔ میں نے کہا: أَيَحْسَبُ الْإِنْسَانُ أَلَّنْ نَجْمَعَ عِظَامَهُ۔ بَلَى قَادِرِينَ عَلَى أَنْ نُسَوِّيَ بَنَانَهُ (القیامۃ: 3، 4) ” کیا آدمی یہ سمجھتا ہے کہ ہم ہرگز اس کی ہڈیاں جمع نہ فرمائیں گے، کیوں نہیں ہم قادر ہیں کہ اس کے پور ٹھیک بنا دیں۔“ (کا کیا مطلب ہے) آپ نے فرمایا: اگر اللہ تعالیٰ چاہتا تو (اس کی انگلیوں کے پورے) اونٹ یا گدھے کے کھر جیسے (بھی) بنا سکتا تھا۔ میں نے کہا: فَمُسْتَقَرٌّ وَّ مُسْتَوْدَعٌ (الانعام: 98) ” پھر کہیں تمہیں ٹھہرنا ہے اور کہیں امانت رہنا ہے۔“ (کا کیا مطلب ہے) آپ نے فرمایا: ٹھہرنا رحم میں ہے اور امانت پشت میں رہنا ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كتاب التفسير/حدیث: 3920]