سیدنا عمرو بن عبسہ رضی اللہ عنہ سے روایت ہے، انہوں نے کہا: میں مکہ میں بعثت کے ابتدائی دور میں رسول اللہ صلی اللہ علیہ وسلم کے پاس حاضر ہوا جبکہ آپ اس وقت (مشرکین سے) چھپ کر رہتے تھے، میں نے پوچھا: آپ کیا ہیں؟ آپ صلی اللہ علیہ وسلم نے فرمایا: ”میں نبی ہوں“، میں نے پوچھا: نبی کیا ہوتا ہے؟ آپ صلی اللہ علیہ وسلم نے فرمایا: ”اللہ کا رسول“، میں نے پوچھا: کیا اللہ نے آپ کو بھیجا ہے؟ آپ صلی اللہ علیہ وسلم نے فرمایا: ”ہاں“، میں نے پوچھا: کس پیغام کے ساتھ بھیجا ہے؟ آپ صلی اللہ علیہ وسلم نے فرمایا: ”اس لیے کہ تم صرف اللہ کی عبادت کرو، بتوں کو توڑ دو اور صلہ رحمی کرو“، میں نے کہا: آپ جس پیغام کے ساتھ آئے ہیں وہ کتنا عمدہ ہے، اس معاملے میں آپ کی پیروی کس نے کی ہے؟ آپ صلی اللہ علیہ وسلم نے فرمایا: ”ایک غلام اور ایک آزاد نے“، یعنی ابوبکر اور بلال رضی اللہ عنہما نے، عمرو کہا کرتے تھے: میں نے خود کو اس وقت دیکھا جب میں اسلام لانے والا چوتھا شخص تھا، وہ کہتے ہیں: پس میں اسلام لے آیا اور عرض کی: یا رسول اللہ! کیا میں آپ کے ساتھ رہوں؟ آپ صلی اللہ علیہ وسلم نے فرمایا: ”نہیں، بلکہ تم اپنی قوم میں واپس چلے جاؤ، جب تمہیں خبر ملے کہ میں (مدینہ) ہجرت کر گیا ہوں تب میرے پاس آ جانا“۔
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4467]