سیدنا عبداللہ بن عباس رضی اللہ عنہما فرماتے ہیں: جب سیدنا حمزہ رضی اللہ عنہ شہید ہو گئے تو سیدہ صفیہ رضی اللہ عنہا ان کو ڈھونڈتی پھر رہی تھیں ان کو پتہ نہیں تھا کہ ان کے ساتھ کیا سلوک کیا گیا ہے۔ یہ سیدنا علی رضی اللہ عنہ اور سیدنا زبیر رضی اللہ عنہ کے ملیں، (اور ان سے سیدنا حمزہ رضی اللہ عنہ کے بارے میں پوچھا) تو سیدنا علی رضی اللہ عنہ نے سیدنا زبیر رضی اللہ عنہ سے کہا: اپنی اماں کو آپ صورت حال بتائیں، جبکہ سیدنا زبیر رضی اللہ عنہ نے انکار کرتے ہوئے سیدنا علی رضی اللہ عنہ سے کہا: تم خود اپنی پھوپھی کو بتاؤ۔ لیکن دونوں نے ہی ان کو یہ ظاہر کیا کہ ہمیں نہیں پتا۔ وہ نبی اکرم صلی اللہ علیہ وسلم کے پاس آ گئیں، نبی اکرم صلی اللہ علیہ وسلم نے (جب ان کی کیفیت دیکھی تو) فرمایا: مجھے تو ان کی عقل ضائع ہونے کا خدشہ ہے۔ پھر حضور صلی اللہ علیہ وسلم نے اپنا ہاتھ ان کے سینے پر رکھ کر ان کے لئے دعا فرمائی۔ پھر انہوں نے انا للہ وانا الیہ راجعون پڑھا اور رونے لگ گئیں، پھر رسول اللہ صلی اللہ علیہ وسلم سیدنا حمزہ رضی اللہ عنہ کی لاش پر تشریف لائے، ان کی لاش کا مثلہ کیا ہوا تھا (یعنی ان کے ناک، کان، ہونٹ وغیرہ اعضاء کاٹے ہوئے تھے) حضور صلی اللہ علیہ وسلم نے فرمایا: اگر عورتوں کی بے صبری کا خدشہ نہ ہوتا تو میں ان کو اسی طرح چھوڑ دیتا حتی کہ یہ پرندوں اور درندوں کے پیٹ سے برآمد ہوتے۔ پھر تمام شہداء کو لانے کا حکم دیا، آپ 9 شہداء اور سیدنا حمزہ رضی اللہ عنہ کے جنازے رکھ کر نماز جنازہ پڑھتے، ان پر سات تکبیریں پڑھتے پھر باقی کو اٹھا لیا جاتا لیکن سیدنا حمزہ رضی اللہ عنہ کو رکھ لیا جاتا، پھر 9 شہداء کو لایا جاتا اور ان پر سات تکبیریں پڑھی جاتیں، پھر باقی شہداء کو اٹھا لیا جاتا، پھر 9 کو لایا جاتا، ان پر سات تکبیریں پڑھی جاتیں، اسی طرح 9، 9 کے ہمراہ سیدنا حمزہ رضی اللہ عنہ کو رکھ کر جنازہ پڑھا جاتا رہا) حتی کہ تمام کی نماز جنازہ پڑھ لی گئی۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4956]