سیدنا زبیر بن عوام رضی اللہ عنہ فرماتے ہیں: رسول اللہ صلی اللہ علیہ وسلم نے جنگ احد کے دن تلوار پیش کی اور فرمایا: اس تلوار کو اس کے حق کے ساتھ کون لے گا؟ (یعنی یہ تلوار لے کر اس کا حق کون ادا کرے گا؟) سیدنا زبیر بن عوام رضی اللہ عنہ فرماتے ہیں: میں نے کھڑے ہو کر عرض کی: یا رسول اللہ صلی اللہ علیہ وسلم میں۔ لیکن حضور صلی اللہ علیہ وسلم نے تلوار مجھے عنایت نہ فرمائی، پھر فرمایا: یہ تلوار اس کے حق کے ساتھ کون لے گا؟ میں نے پھر عرض کی: یا رسول اللہ صلی اللہ علیہ وسلم میں۔ حضور صلی اللہ علیہ وسلم نے پھر بھی وہ تلوار مجھے عنایت نہ فرمائی۔ پھر فرمایا: یہ تلوار اس کے حق کے ساتھ کون لے گا؟ پھر سیدنا ابودجانہ سماک بن خرشہ رضی اللہ عنہ کھڑے ہوئے اور کہنے لگے: یا رسول اللہ صلی اللہ علیہ وسلم یہ تلوار میں اس کے حق کے ساتھ لیتا ہوں۔ یہ ارشاد فرما دیجئے کہ اس کا حق کیا ہے؟ آپ صلی اللہ علیہ وسلم نے فرمایا: اس کا حق یہ ہے کہ اس کے ساتھ کسی مسلمان کو قتل نہ کیا جائے، اور کوئی کافر اس کے وار سے بچ کر نہ نکلے، سیدنا زبیر رضی اللہ عنہ فرماتے ہیں: تب رسول اللہ صلی اللہ علیہ وسلم نے یہ تلوار ابودجانہ رضی اللہ عنہ کو عطا فرما دی، (سیدنا ابودجانہ کی عادت تھی کہ) وہ جب جنگ کا ارادہ کر لیتے تو سر پر سرخ رنگ کی پٹی باندھ لیتے تھے، سیدنا زبیر رضی اللہ عنہ فرماتے ہیں: میں نے سوچ رکھا تھا کہ آج میں ابودجانہ رضی اللہ عنہ کے جنگی جوہر دیکھوں گا، چنانچہ ابودجانہ رضی اللہ عنہ کے سامنے جو چیز بھی ابھرتی، آپ اس کو (گاجر مولی کی طرح) کاٹتے ہوئے آگے گزر جاتے، حتی کہ آپ پہاڑ کے دامن میں کچھ عورتوں کے پاس جا پہنچے، ان کے پاس دف تھے اور ان میں سے ایک عورت یہ اشعار گا رہی تھی۔ * ہم طارق کی بیٹیاں ہیں ہم بادلوں کے ساتھ چلتی ہیں۔ * اگر تم قبول کرو تو ہم معانقہ کرتی ہیں اور بستر بچھاتی ہیں۔ * یا (اگر) تم منہ پھیر کر جاؤ تو ہم بھی بغیر محبت کئے بچھڑ جاتی ہیں “۔ سیدنا زبیر رضی اللہ عنہ فرماتے ہیں: انہوں نے ایک عورت کو مارنے کے لئے تلوار سونتی، پھر ہاتھ روک لیا، پھر جب جنگ میں کچھ وقفہ آیا تو میں نے ان سے کہا: میں نے تمہاری مکمل لڑائی کا مشاہدہ کیا ہے ان میں ایک چیز میں نے نوٹ کی ہے کہ تم نے ایک عورت پر تلوار اٹھائی تھی، پھر اس کو مارے بغیر تلوار ہٹا لی (اس کی کیا وجہ ہے؟) ابودجانہ رضی اللہ عنہ نے کہا: خدا کی قسم! میں نے رسول اللہ صلی اللہ علیہ وسلم کی تلوار کی عزت و ناموس کا خیال کرتے ہوئے اس عورت کو نہیں مارا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 5089]