سیدنا انس رضی اللہ عنہ فرماتے ہیں: جنگ احد کے دن صحابہ کرام رضی اللہ عنہم رسول اللہ صلی اللہ علیہ وسلم کے اردگرد پروانہ وار جمع تھے، آپ صلی اللہ علیہ وسلم نے اپنی تلوار تھامی اور فرمایا: یہ تلوار کون لے گا؟ کافی سارے لوگ تلوار لینے کے لئے ہاتھ بڑھا کر کہنے لگے: مجھے عطا فرمائیں، مجھے عطا فرمائیں۔ آپ صلی اللہ علیہ وسلم نے فرمایا: یہ تلوار لے کر اس کا حق کون ادا کرے گا؟ (یہ سن کر کئی لوگ) پیچھے ہٹ گئے، سیدنا ابودجانہ رضی اللہ عنہ نے عرض کی: یا رسول اللہ صلی اللہ علیہ وسلم میں اس کا حق ادا کروں گا، رسول اللہ صلی اللہ علیہ وسلم نے وہ تلوار ان کو عطا فرما دی، سیدنا ابودجانہ رضی اللہ عنہ نے اس تلوار کے ساتھ مشرکین کی کھوپڑیاں ادھیڑ کر رکھ دیں۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 5088]