جعفر بن عمرو بن حریث اپنے والد کا یہ بیان نقل کرتے ہیں کہ نبی اکرم صلی اللہ علیہ وسلم نے سیدنا عبداللہ بن مسعود رضی اللہ عنہ سے فرمایا: قرآن کی قراءت کرو، (سیدنا عبداللہ نے) کہا: قرآن تو آپ صلی اللہ علیہ وسلم پر نازل ہوا ہے تو میں قراءت کیسے کروں؟ رسول اللہ صلی اللہ علیہ وسلم نے فرمایا: میں دوسرے سے قرآن سننا چاہتا ہوں۔ چنانچہ سیدنا عبداللہ بن مسعود رضی اللہ عنہ نے سورۃ النساء کی تلاوت شروع کی جب وہ اس آیت پر پہنچے۔ فَکَیْفَ اِذَا جِئْنَا مِنْ کُلِّ اُمَّۃٍ بِشَھِیْدٍ وَجِئْنَا بِکَ عَلیٰ ھَؤُلَاءِ شَھِیْدًا (النساء: 41) ”تو کیسی ہو گی جب ہم ہر امت سے ایک گواہ لائیں گے اور اے محبوب تمہیں ان سب پر گواہ اور نگہبان بنا کر لائیں گے“ تو رسول اللہ صلی اللہ علیہ وسلم آبدیدہ ہو گئے، اس مقام پر حضور صلی اللہ علیہ وسلم نے عبداللہ بن مسعود رضی اللہ عنہ کو تلاوت سے روک دیا۔ پھر رسول اللہ صلی اللہ علیہ وسلم نے ان کو کہا: اب بات کرو، تو انہوں نے اپنی گفتگو سے پہلے اللہ تعالیٰ کی حمد و ثناء کی اور رسول اللہ صلی اللہ علیہ وسلم پر درود و سلام پڑھا اور حق کی گواہی دی، اور پھر کہا: ہم اللہ تعالیٰ کے رب ہونے پر، اسلام کے دین ہونے پر راضی ہیں۔ اور میں تمہارے لئے اس چیز پر راضی ہوں جس چیز پر اللہ اور اس کا رسول راضی ہیں۔ رسول اللہ صلی اللہ علیہ وسلم نے فرمایا: میں تمہارے اس چیز پر راضی ہوں جس چیز پر ام معبد کے بیٹے راضی ہیں۔ ٭٭ یہ حدیث صحیح الاسناد ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 5480]