سیدنا جابر بن سمرہ رضی اللہ عنہ فرماتے ہیں کہ نبی اکرم صلی اللہ علیہ وسلم سیدنا ابوایوب رضی اللہ عنہ کے گھر ٹھہرے، رسول اللہ صلی اللہ علیہ وسلم جب کھانا کھاتے تو بچا ہوا، ان کی جانب بھیج دیتے، سیدنا ابوایوب رضی اللہ عنہ اس چیز کو نوٹ کیا کرتے تھے کہ برتن میں رسول اللہ صلی اللہ علیہ وسلم نے کہاں کہاں سے کھایا اور کہاں کہاں آپ صلی اللہ علیہ وسلم کا ہاتھ مبارک لگا، تو وہ اسی مقام سے کھاتے جہاں رسول اللہ صلی اللہ علیہ وسلم کا دست مبارک مس ہوا ہوتا تھا۔ ایک دن انہوں نے کھانا پکایا اور اس میں لہسن بھی ڈال دیا، کھانا پکا کر بارگاہ مصطفی صلی اللہ علیہ وسلم میں پیش کیا۔ رسول اللہ صلی اللہ علیہ وسلم نے وہ کھانا واپس بھجوا دیا، سیدنا ابوایوب رضی اللہ عنہ رسول اللہ صلی اللہ علیہ وسلم کی خدمت میں حاضر ہوئے اور عرض کی: یا رسول اللہ صلی اللہ علیہ وسلم آج کھانے میں آپ کی مبارک انگلیوں کے نشانات نظر نہیں آ رہے؟ آپ صلی اللہ علیہ وسلم نے فرمایا (آج میں نے کھانا نہیں کھایا، بلکہ اسی طرح واپس بھیج دیا کیونکہ) اس میں لہسن تھا۔ ٭٭ سیدنا شعبہ سے بھی یہ حدیث مروی ہے، اس میں یہ بھی ہے کہ سیدنا ابوایوب رضی اللہ عنہ نے رسول اللہ صلی اللہ علیہ وسلم سے پوچھا کہ یا رسول اللہ صلی اللہ علیہ وسلم کیا یہ حرام ہے؟ تو آپ صلی اللہ علیہ وسلم نے فرمایا: نہیں۔ اور حماد نے اپنی حدیث میں یہ الفاظ ذکر کئے ہیں ” سیدنا ابوایوب رضی اللہ عنہ نے پوچھا: یا رسول اللہ صلی اللہ علیہ وسلم آپ نے کھانا کھائے بغیر واپس کیوں بھیج دیا؟ آپ صلی اللہ علیہ وسلم نے فرمایا: تم میرے جیسے نہیں ہو، میرے پاس تو فرشتہ آتا ہے۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 6051]