سیدنا عبداللہ بن عمر رضی اللہ عنہما کے بارے میں مروی ہے کہ وہ سیدنا ابوہریرہ رضی اللہ عنہ کے پاس سے گزرے۔ اس وقت سیدنا ابوہریرہ رضی اللہ عنہ نبی اکرم صلی اللہ علیہ وسلم کی یہ حدیث بیان کر رہے تھے ” جو جنازے کے ساتھ چلا، اس کے لئے ایک قیراط (ثواب) ہے، اور اگر وہ اس کی تدفین میں بھی شریک ہوا تو اس کے لئے دو قیراط (ثواب) ہے۔ جو کہ احد پہاڑ سے بھی بڑا ہے۔ سیدنا عبداللہ بن عمر رضی اللہ عنہما نے کہا: اے ابوہریرہ رضی اللہ عنہ غور تو کرو تم رسول اللہ صلی اللہ علیہ وسلم کے حوالے سے کیا بیان کر رہے ہو؟ سیدنا ابوہریرہ رضی اللہ عنہ اٹھے اور ام المومنین سیدہ عائشہ رضی اللہ عنہا کے پاس چلے آئے اور عرض کی: اے ام المومنین! میں تمہیں اللہ کی قسم دے کر پوچھتا ہوں کیا تم نے رسول اللہ صلی اللہ علیہ وسلم کو یہ فرماتے ہوئے سنا ہے ” جو شخص جنازہ کے ساتھ چلا اس کے لئے ایک قیراط ہے، اور اگر وہ اس کی تدفین میں بھی شریک ہوا تو اس کے لئے دو قیراط ہے۔ ام المومنین سیدہ عائشہ رضی اللہ عنہا نے کہا: جی ہاں۔ سیدنا ابوہریرہ رضی اللہ عنہ نے کہا: کسی شادی یا بازار کے کام کی وجہ سے میں رسول اللہ صلی اللہ علیہ وسلم کی بارگاہ سے کبھی غیر حاضر نہیں ہوا۔ میں تو رسول اللہ صلی اللہ علیہ وسلم سے ایک ایک کلمہ سیکھنے اور ایک ایک لقمہ کھانے کا طلبگار ہوا کرتا تھا۔ سیدنا عبداللہ بن عمر رضی اللہ عنہما نے کہا: اے ابوہریرہ رضی اللہ عنہ ہم سب سے زیادہ تم رسول اللہ صلی اللہ علیہ وسلم کے ساتھ رہتے تھے، اور تم رسول اللہ صلی اللہ علیہ وسلم کی احادیث کو ہم سے زیادہ جانتے ہو۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 6291]