صعصعہ بن ناجیہ مجاشعی فرزدق بن غالب کے دادا ہیں، آپ فرماتے ہیں: میں نبی اکرم صلی اللہ علیہ وسلم کی خدمت میں حاضر ہوا، آپ صلی اللہ علیہ وسلم نے مجھے اسلام کی دعوت پیش کی، میں نے اسلام قبول کر لیا، آپ صلی اللہ علیہ وسلم نے مجھے قرآن کریم کی چند آیات کی تعلیم دی، میں نے پوچھا یا رسول اللہ صلی اللہ علیہ وسلم ! میں نے زمانہ جاہلیت میں بہت سارے نیکی کے کام کئے ہیں، کیا مجھے ان پر ثواب ملے گا؟ حضور صلی اللہ علیہ وسلم نے پوچھا: تم نے کیا عمل کیا ہے؟ میں نے کہا: میری دو اونٹنیاں گم ہو گئی تھیں، میں اپنے اونٹ پر سوار ہو کر ان کو ڈھونڈنے نکلا، میں نے دیکھا کہ میرے سامنے زمین سے اوپر فضا میں دو مکان بنے ہوئے ہیں، میں ان میں گیا، ان میں سے ایک میں ایک بوڑھا آدمی بیٹھا ہوا تھا میں نے اس سے پوچھا: تم نے دو اونٹنیوں کو کہیں دیکھا ہے؟ مقسم بن دارم نے کہا: تمہاری وہ اونٹنیاں ہمیں ملی تھیں، ہم نے وہ بیچ دی ہیں، اور اللہ تعالیٰ ان دونوں اونٹنیوں کے بدلے تیری قوم اور قبیلے عرب میں سے قبیلہ مضر سے انتقام لے گا، ابھی وہ ہم سے باتیں ہی کر رہا تھا کہ دوسرے گھر سے ایک عورت نے اس کو آواز دی ” پیدا ہو گئی پیدا ہو گئی “۔ اس نے پوچھا: کیا پیدا ہو گئی؟ اگر وہ لڑکا ہے تو اس کو ہماری قوم میں شریک کر دو، اور اگر لڑکی ہے تو اس کو زندہ دفن کر دو، اس نے کہا: لڑکی ہے، میں نے کہا: یہ نومولود کس کی بچی ہے؟ اس نے کہا: میری بیٹی ہے، میں نے کہا: میں وہ لڑکی تم سے خریدتا ہوں، اس نے کہا: اے بنی تمیم کے آدمی! کیا تم اپنی بیٹی بیچ سکتے ہو؟ میں عرب کا رہنے والا قبیلہ مضر کا آدمی ہوں۔ میں نے کہا: میں تم سے اس لڑکی کا جسم نہیں خرید رہا بلکہ میں اس کی روح خرید رہا ہوں تاکہ تو اس کو قتل نہ کرے، اس نے پوچھا: تم کتنے میں خرید رہے ہو؟ میں نے کہا: ان دونوں اونٹنیوں اور ان کے بچوں کے عوض۔ اس نے کہا: جس اونٹ پر سوار ہو کر آئے ہو، یہ بھی مجھے دے دو، میں نے کہا: ٹھیک ہے، شرط یہ ہے کہ تم اپنے کسی آدمی کو میرے ہمراہ بھیج دو، وہ مجھے میرے گھر تک چھوڑ آئے، جب میں گھر پہنچ جاؤں گا تو یہ اونٹ اس کے حوالے کر دوں گا۔ ہم وہاں سے چل دیئے، ابھی ہم راستے ہی میں تھے، میں نے سوچا کہ میں جو کام کرنا چاہتا ہوں، کسی عربی شخص نے آج سے پہلے ایسا کام نہیں کیا، اب اسلام ظاہر ہو چکا ہے، میں 360 بچیوں کو خرید کر زندہ درگور ہونے سے بچا چکا ہوں، ان میں سے ہر بچی کی قیمت میں نے دو اونٹنیاں اور ایک اونٹ لگائی، کیا اس نیکی کا مجھے کوئی ثواب ملے گا؟ نبی اکرم صلی اللہ علیہ وسلم نے فرمایا: تیرے لئے اس کا ثواب کامل ہو چکا ہے کیونکہ اللہ تعالیٰ نے تجھے اسلام کی توفیق دی ہے۔ عبادنامی راوی کہتے ہیں: صعصہ کے قول کا مصداق فرزدق کا یہ قول ہے۔ * اور میرے والد نے بے شمار ایسی بچیوں کو زندہ درگور ہونے سے بچایا ہے جن کو ان کے والدین زندہ دفن کرنا چاہتے تھے۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 6707]