عمر بن ابی سلمہ بن عبدالاسد بیان کرتے ہیں کہ میرے والد محترم جنگ احد میں گئے، ابواسامہ جشمی نے ان کے بازو میں تیر مارا، اس کے بعد ایک مہینہ تک والد صاحب نے اس زخم کا علاج کروایا، زخم بالکل ٹھیک ہو گیا، پھر رسول اللہ صلی اللہ علیہ وسلم نے 35 مہینے بعد محرم الحرام میں ان کو قطن کی جانب بھیجا، آپ 29 راتیں غائب رہے، پھر واپس آ گئے، 4 ہجری 8 صفر المظفر کو آپ واپس آ گئے، ان کا زخم دوبارہ خراب ہو گیا تھا، اسی زخم کی وجہ سے 4 ہجری 8 جمادی الآخر کو وصال فرما گئے۔ پھر میری والدہ نے عدت گزاری۔ 4 ہجری کے شوال کی 20 تاریخ کو میری والدہ کی عدت پوری ہو گئی۔ سن 4 ہجری کے شوال کے ابھی دس دن رہتے تھے کہ رسول اللہ صلی اللہ علیہ وسلم نے سیدہ ام سلمہ رضی اللہ عنہا کے ساتھ نکاح کر لیا۔ پھر اہل مدینہ کہا کرتے تھے عرب کی ” ایک خاتون “ اسلام اور مسلمانوں کے سردار کے پاس رات کے اول حصہ میں دلہن بن کر داخل ہوئی اور رات کے آخری حصہ میں وہ چکی پر دانے پیس رہی تھی۔ یہ ام المومنین سیدہ ام سلمہ رضی اللہ عنہا ہیں۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 6915]