سیدنا ابوہریرہ رضی اللہ عنہ فرماتے ہیں کہ رسول اللہ صلی اللہ علیہ وسلم سیدنا عثمان بن عفان رضی اللہ عنہ سے ملے، سیدنا عثمان رضی اللہ عنہ اس وقت پریشان تھے۔ نبی اکرم صلی اللہ علیہ وسلم نے پریشانی کی وجہ پوچھی تو سیدنا عثمان نے جواباً عرض کی: یا رسول اللہ صلی اللہ علیہ وسلم میرے ماں باپ آپ پر قربان ہو جائیں، جو مصیبت مجھے آئی ہے، کیا ایسی مصیبت کسی کو آ سکتی ہے؟ رسول اللہ صلی اللہ علیہ وسلم کی صاحبزادی کا وصال ہو گیا ہے (اللہ تعالیٰ ان پر رحمت نازل فرمائے) یا رسول اللہ صلی اللہ علیہ وسلم ان کے وصال کی وجہ سے آپ کے داماد ہونے کا رشتہ ٹوٹ گیا ہے جو دو جہانوں میں میرے کام آنے کا تھا، رسول اللہ صلی اللہ علیہ وسلم نے فرمایا: اے عثمان تم یہ بات کہہ رہے ہو اور ادھر جبریل امین علیہ السلام مجھے اللہ تعالیٰ کا حکم دے رہے ہیں کہ میں اس کی بہن ” ام کلثوم “ کا نکاح بھی تمہارے ساتھ کر دوں، حق مہر بھی اسی کے جتنا ہو اور عدت بھی اسی کی مثل ہو، چنانچہ رسول اللہ صلی اللہ علیہ وسلم نے سیدنا عثمان رضی اللہ عنہ کے ساتھ اپنی بیٹی ” ام کلثوم “ کا بھی نکاح کر دیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 7033]