سیدنا انس بن مالک رضی اللہ عنہ فرماتے ہیں: بنی زہرہ کا ایک آدمی سیدنا عمر رضی اللہ عنہ کے قبول اسلام سے پہلے ان سے ملا، سیدنا عمر تلوار لٹکائے جا رہے تھے، اس نے پوچھا: کہاں جا رہے ہو؟ سیدنا عمر رضی اللہ عنہ نے کہا: محمد کو قتل کرنے جا رہا ہوں، اس نے کہا: اے عمر! کیا میں تمہیں اس سے بھی زیادہ عجیب بات نہ بتاؤں؟ تمہارا بہنوئی سعید اور تمہاری بہن اپنے آباء کے دین کو چھوڑ کر صابی ہو چکے ہیں۔ راوی کہتے ہیں: سیدنا عمر رضی اللہ عنہ اسی وقت غصے کے عالم میں چلتے ہوئے بہن کے گھر آئے، جب وہ ان کے دروازے کے قریب پہنچے، ان لوگوں کے پاس خباب نامی ایک شخص ہوتا تھا، وہ ان دونوں کو سورۃ طہ کی تعلیم دے رہا تھا، جب خباب رضی اللہ عنہ نے سیدنا عمر رضی اللہ عنہ کے قدموں کی آہٹ سنی، تو ان کی چارپائی کے نیچے چھپ گئے، سیدنا عمر رضی اللہ عنہ اندر آئے اور کہنے لگے: یہ جو تم آہستہ آواز میں پڑھ رہے تھے جو ابھی میں نے تمہارے پاس دیکھا، یہ کیا ہے؟ ان کے بہنوئی سیدنا سعید بن زید رضی اللہ عنہ نے کہا: اے عمر! تمہارا کیا خیال ہے، اگر حق تیرے دین کے علاوہ کسی دوسرے دین میں ہو، سیدنا عمر رضی اللہ عنہ نے سیدنا زید کو مارنا شروع کر دیا، سیدنا عمر کی بہن نے اپنے شوہر کا دفاع کرتے ہوئے سیدنا عمر کا ہاتھ پکڑنا چاہا تو سیدنا عمر نے ان کے چہرے پر تھپڑ رسید کر دیا، ان کے چہرے پر تھپڑ کا نشان چھپ گیا، ان کی بہن نے جلال میں آ کر کہا: اے عمر! اگر سچائی تمہارے دین کے خلاف میں ہو تو تمہارا کیا خیال ہے؟ میں گواہی دیتی ہوں کہ اللہ تعالیٰ کے سوا کوئی عبادت کے لائق نہیں ہے اور میں گواہی دیتی ہوں کہ محمد صلی اللہ علیہ وسلم اللہ تعالیٰ کے رسول ہیں۔ (سیدنا انس رضی اللہ عنہ) فرماتے ہیں: جب سیدنا عمر رضی اللہ عنہ مایوس ہو گئے تو فرمایا: تم وہ تحریر مجھے دو جو تمہارے پاس ہے، میں اس کو پڑھنا چاہتا ہوں، ان کی بہن نے کہا: تم پلید ہو، اور اس تحریر کو صرف پاک شخص چھو سکتا ہے، اٹھو غسل کرو یا (کم از کم) وضو کر لو، (اس کے بعد مفصل حدیث بیان کی) [المستدرك على الصحيحين/كتاب معرفة الصحابة رضي الله تعالى عنهم/حدیث: 7071]