سیدنا ابوہریرہ رضی اللہ عنہ فرماتے ہیں کہ نبی اکرم صلی اللہ علیہ وسلم سے عرض کیا گیا: یا رسول اللہ صلی اللہ علیہ وسلم فلاں عورت دن بھر روزہ رکھتی ہے ساری ساری رات عبادت کرتی ہے، لیکن اپنی زبان سے پڑوسیوں کو تکلیف دیتی ہے۔ حضور صلی اللہ علیہ وسلم نے فرمایا: اس میں کوئی بھلائی نہیں ہے، وہ دوزخی ہے۔ اور آپ سے عرض کی گئی: یا رسول اللہ صلی اللہ علیہ وسلم فلاں عورت صرف فرض نمازیں پڑھتی ہے، صرف رمضان کے روزے رکھتی ہے اور پنیر کے ٹکڑے، صدقہ کرتی ہے، لیکن وہ اپنی زبان کے ساتھ کسی کو تکلیف نہیں دیتی، حضور صلی اللہ علیہ وسلم نے فرمایا: وہ جنتی ہے۔ [المستدرك على الصحيحين/كتاب البر والصلة/حدیث: 7492]