سیدنا ابوہریرہ رضی اللہ عنہ فرماتے ہیں کہ رسول اللہ صلی اللہ علیہ وسلم سے عرض کی گئی: یا رسول اللہ صلی اللہ علیہ وسلم فلاں عورت رات کو قیام کرتی ہے اور دن کو روزہ رکھتی ہے، جبکہ وہ گفتگو سے اپنے پڑوسیوں کو تکلیف دیتی ہے، بہت زبان دراز ہے، حضور صلی اللہ علیہ وسلم نے فرمایا: اس میں کوئی بھلائی نہیں ہے، وہ دوزخی ہے۔ یونہی ایک دوسری عورت کے بارے میں عرض کی گئی: یا رسول اللہ صلی اللہ علیہ وسلم فلاں عورت صرف فرض نمازیں پڑھتی ہے، صرف رمضان کے روزے رکھتی ہے اور پنیر کے ٹکڑے صدقہ کرتی ہے، اس کے علاوہ اس کی کوئی خاص عبادت نہیں ہے۔ اور وہ اپنی زبان سے کسی کو تکلیف نہیں دیتی، حضور صلی اللہ علیہ وسلم نے فرمایا: وہ جنتی ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب البر والصلة/حدیث: 7491]