عبد الرحمن بن بیلمانی کہتے ہیں کہ میں نے رسول اللہ صلی اللہ علیہ وسلم کے صحابہ میں سے ایک شخص کو فرماتے سنا کہ میں نے رسول اللہ صلی اللہ علیہ وسلم کو یہ ارشاد فرماتے ہوئے سنا: ”جس نے مرنے سے ایک دن پہلے بھی اللہ کے حضور توبہ کر لی، اللہ اس کی توبہ قبول فرما لے گا“۔ انہوں نے کہا: پھر میں نے رسول اللہ صلی اللہ علیہ وسلم کے ایک دوسرے صحابی سے اس کا ذکر کیا تو انہوں نے پوچھا: کیا تم نے خود یہ سنا ہے؟ میں نے کہا: ہاں، تو انہوں نے کہا: میں گواہی دیتا ہوں کہ میں نے رسول اللہ صلی اللہ علیہ وسلم کو یہ فرماتے سنا ہے: ”جس نے مرنے سے آدھا دن پہلے توبہ کر لی، اللہ اس کی توبہ قبول فرما لے گا“۔ راوی کہتے ہیں: پھر میں نے رسول اللہ صلی اللہ علیہ وسلم کے ایک اور صحابی سے اس کا ذکر کیا، انہوں نے پوچھا: کیا تم نے یہ سنا ہے؟ میں نے کہا: ہاں، تو انہوں نے کہا: میں گواہی دیتا ہوں کہ میں نے رسول اللہ صلی اللہ علیہ وسلم کو یہ فرماتے سنا ہے: ”جس نے مرنے سے ایک پہر (ضحوہ) پہلے توبہ کر لی، اللہ اس کی توبہ قبول فرما لے گا“۔ راوی کہتے ہیں: پھر میں نے رسول اللہ صلی اللہ علیہ وسلم کے ایک اور صحابی سے اس کا ذکر کیا، انہوں نے پوچھا: کیا تم نے یہ سنا ہے؟ میں نے کہا: ہاں، تو انہوں نے کہا: میں گواہی دیتا ہوں کہ میں نے رسول اللہ صلی اللہ علیہ وسلم کو یہ فرماتے سنا ہے: ”جس نے غرغرہ (موت کی ہچکی) شروع ہونے سے پہلے توبہ کر لی، اللہ اس کی توبہ قبول فرما لے گا۔“ [المستدرك على الصحيحين/كتاب التوبة والإنابة/حدیث: 7854]