سیدنا عبداللہ بن عمرو رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: ”جس نے اپنی موت سے ایک سال پہلے توبہ کر لی اس کی توبہ قبول کر لی جائے گی“، یہاں تک کہ آپ صلی اللہ علیہ وسلم نے فرمایا: ”ایک ماہ پہلے“، یہاں تک کہ فرمایا: ”ایک ہفتہ پہلے“، یہاں تک کہ فرمایا: ”ایک دن پہلے“، یہاں تک کہ فرمایا: ”ایک گھنٹہ پہلے“، یہاں تک کہ آپ صلی اللہ علیہ وسلم نے فرمایا: ”اونٹنی کے دو بار دودھ دوہنے کے درمیانی وقفے (یعنی ایک مختصر لمحے) کے برابر پہلے (توبہ کر لی تو قبول ہوگی)۔“ راوی کہتے ہیں کہ میں نے عرض کیا: سبحان اللہ! کیا اللہ عزوجل نے یہ نہیں فرمایا: ﴿وَلَيْسَتِ التَّوْبَةُ لِلَّذِينَ يَعْمَلُونَ السَّيِّئَاتِ حَتَّى إِذَا حَضَرَ أَحَدَهُمُ الْمَوْتُ قَالَ إِنِّي تُبْتُ الآنَ﴾ [سورة النساء: 18] ”اور ان لوگوں کے لیے توبہ (کی قبولیت) نہیں ہے جو برائیاں کرتے رہتے ہیں یہاں تک کہ جب ان میں سے کسی کی موت کا وقت آ پہنچتا ہے تو وہ کہتا ہے کہ اب میں نے توبہ کی“؟ تو سیدنا عبداللہ رضی اللہ عنہ نے فرمایا: میں تمہیں وہی بیان کر رہا ہوں جو میں نے رسول اللہ صلی اللہ علیہ وسلم سے سنا ہے۔ [المستدرك على الصحيحين/كتاب التوبة والإنابة/حدیث: 7857]