سفیان ثوری رحمہ اللہ سے روایت ہے کہ انہوں نے عبدالرحمن بن بیلمانی کو خط لکھ کر ان کے والد سے مروی ایک حدیث کے بارے میں دریافت کیا، تو انہوں نے جواباً لکھا: ان کے والد نے انہیں بتایا کہ وہ رسول اللہ صلی اللہ علیہ وسلم کے صحابہ کی ایک جماعت کی مجلس میں بیٹھے تھے، تو ان میں سے ایک صاحب نے کہا: میں نے رسول اللہ صلی اللہ علیہ وسلم کو فرماتے ہوئے سنا: ”جس نے اپنی موت سے ایک سال پہلے اللہ کے حضور توبہ کر لی، اللہ اس کی توبہ قبول فرما لے گا“، اس پر ایک دوسرے صاحب نے پوچھا: کیا آپ نے خود یہ رسول اللہ صلی اللہ علیہ وسلم سے سنا ہے؟ انہوں نے کہا: ہاں، تو انہوں نے کہا: میں نے بھی یہ سنا ہے۔ پھر ایک اور صاحب نے کہا: میں نے رسول اللہ صلی اللہ علیہ وسلم کو فرماتے ہوئے سنا: ”جس نے اپنی موت سے ایک دن پہلے اللہ عزوجل کے حضور توبہ کر لی، اللہ اس کی توبہ قبول فرما لے گا“، دوسرے نے پوچھا: کیا آپ نے خود یہ رسول اللہ صلی اللہ علیہ وسلم سے سنا ہے؟ انہوں نے کہا: ہاں، تو انہوں نے کہا: میں نے بھی یہ سنا ہے۔ پھر ایک اور صاحب نے کہا: میں نے رسول اللہ صلی اللہ علیہ وسلم کو فرماتے ہوئے سنا: ”جس نے اپنی موت سے ایک گھنٹہ پہلے اللہ عزوجل کے حضور توبہ کر لی، اللہ اس کی توبہ قبول فرما لے گا“، دوسرے نے پوچھا: کیا آپ نے خود یہ رسول اللہ صلی اللہ علیہ وسلم سے سنا ہے؟ انہوں نے کہا: ہاں، تو انہوں نے کہا: میں نے بھی یہ سنا ہے۔ پھر ایک اور صاحب نے کہا: میں نے رسول اللہ صلی اللہ علیہ وسلم کو فرماتے ہوئے سنا: ”جس نے (موت کی ہچکی اور) غرغرہ شروع ہونے سے پہلے توبہ کر لی، اللہ اس کی توبہ قبول فرما لے گا“۔
سفیان بن سعید اگرچہ دراوردی اور ہشام بن سعد سے زیادہ بڑے حافظِ حدیث ہیں، لیکن انہوں نے اس حدیث میں ابن بیلمانی یا زید بن اسلم سے اپنے براہِ راست سماع کا ذکر نہیں کیا بلکہ اسے بطورِ اجازہ اور خط و کتابت ذکر کیا ہے، لہٰذا اس معاملے میں ان لوگوں کی بات زیادہ معتبر ہوگی جنہوں نے اسے زید بن اسلم عن ابن بیلمانی عن رجل من اصحاب النبی صلی اللہ علیہ وسلم کی سند سے روایت کیا، اور عبداللہ بن نافع مدنی نے ہشام بن سعد سے اپنی روایت میں اس صحابی کا نام واضح کر دیا ہے کہ وہ سیدنا عبداللہ بن عمرو بن عاص رضی اللہ عنہما ہیں۔ [المستدرك على الصحيحين/كتاب التوبة والإنابة/حدیث: 7856]