سیدنا ابوذر رضی اللہ عنہ فرماتے ہیں کہ نبی اکرم صلی اللہ علیہ وسلم نے ارشاد فرمایا: اے ابوذر! تمہارا کیا خیال ہے؟ کثرت مال غنی ہے؟ میں نے کہا: جی ہاں۔ آپ صلی اللہ علیہ وسلم نے فرمایا: اور تم قلت مال کو فقر سمجھتے ہو؟ میں نے کہا: جی ہاں۔ آپ صلی اللہ علیہ وسلم نے فرمایا: ایسی بات نہیں ہے، دولتمندی، دل کی دولتمندی ہے اور فقر بھی دل کا فقر ہے۔ مطلب امیر وہ ہے جس کا دل امیر ہو، اور غریب وہ ہے جس دل غریب ہو۔ پھر حضور صلی اللہ علیہ وسلم نے مجھ سے قریش کے ایک آدمی کے بارے میں فرمایا: تم اس کو کیسا سمجھتے ہو؟ میں نے کہا: وہ جس سے کچھ مانگتا ہے، اس کو وہ ملتا ہے، وہ جہاں موجود ہوتا ہے اس کو اندر بلایا جاتا ہے، پھر آپ صلی اللہ علیہ وسلم نے مجھ سے اہل صفہ میں سے ایک آدمی کے بارے میں فرمایا: کیا تم فلاں کو جانتے ہو؟ میں نے کہا: نہیں یا رسول اللہ صلی اللہ علیہ وسلم ! حضور صلی اللہ علیہ وسلم اس کی نشانیاں بتاتے رہے، حتیٰ کہ میں نے اس کو پہچان لیا، میں نے کہا: جی ہاں یا رسول اللہ صلی اللہ علیہ وسلم میں اس کو پہچانتا ہوں، حضور صلی اللہ علیہ وسلم نے فرمایا: تم اس کو کیسا سمجھتے ہو؟ میں نے کہا: وہ مسجد میں رہنے والا ایک مسکین شخص ہے، حضور صلی اللہ علیہ وسلم نے فرمایا: اس قریشی جیسے لوگوں سے پوری زمین بھر جائے، وہ سب مل کر بھی اس آدمی جیسے نہیں ہو سکتے۔ میں نے کہا: یا رسول اللہ صلی اللہ علیہ وسلم کیا وہ بعض چیزیں اس کو نہیں دی گئیں جو دوسرے کو دی گئی ہیں۔ حضور صلی اللہ علیہ وسلم نے فرمایا: اگر اس کو وہ نعمتیں دی گئی ہیں تو وہ ان کا اہل ہے، اور اگر اس کو کچھ نعمتیں نہیں دی گئیں تو اس کو اس کے بدلے میں نیکیاں دی گئی ہیں۔ ٭٭ امام بخاری رحمۃ اللہ علیہ اور امام مسلم رحمۃ اللہ علیہ نے اس کو اعمش، پھر زید بن وہب پھر ابوذر سے محتصراً روایت کیا ہے۔ [المستدرك على الصحيحين/كتاب الرقاق/حدیث: 8127]