عثمان بن حکیم نے زیاد بن علاقہ سے روایت کیا ہے کہ اسامہ بن شریک فرماتے ہیں: ہم لوگ نبی اکرم صلی اللہ علیہ وسلم کی بارگاہ میں یوں بیٹھے ہوتے تھے جیسا کہ ہمارے سروں پر پرندے بیٹھے ہوں، سب خاموش بیٹھے رہتے، کوئی بھی بات نہ کرتا۔ جب کوئی دیہاتی آپ صلی اللہ علیہ وسلم کے پاس آتا، اپنی مشکلات اور پریشانیاں بیان کرتا اور آپ صلی اللہ علیہ وسلم سے مختلف معاملات میں شرعی راہنمائی لیتا تو حضور صلی اللہ علیہ وسلم فرماتے: اللہ تعالیٰ نے دشوار کام معاف فرما دیے ہیں سوائے اس شخص کے، کہ جس نے اپنے کسی مسلمان بھائی کی عزت اچھالی ہو، ایسا شخص حرج میں پڑا اور ہلاک ہو گیا، صحابہ کرام رضی اللہ عنہم نے پوچھا: یا رسول اللہ صلی اللہ علیہ وسلم کیا ہم دوائی لے لیا کریں؟ آپ صلی اللہ علیہ وسلم نے فرمایا: جی ہاں۔ اللہ تعالیٰ نے ایسی کوئی بیماری پیدا نہیں کی، جس کا علاج نہ ہو، سوائے ایک بیماری کے، صحابہ کرام رضی اللہ عنہم نے پوچھا: یا رسول اللہ صلی اللہ علیہ وسلم وہ بیماری کون سی ہے؟ آپ صلی اللہ علیہ وسلم نے فرمایا: بڑھاپا۔ صحابہ کرام رضی اللہ عنہم نے پوچھا: اللہ کے بندوں میں اللہ تعالیٰ کو سب سے زیادہ کون پسند ہے؟ آپ صلی اللہ علیہ وسلم نے فرمایا: جس کے اخلاق سب سے اچھے ہوں۔ زہیر بن معاویہ جعفی کی روایت کردہ مذکورہ حدیث [المستدرك على الصحيحين/كتاب الطب/حدیث: 8416]