سیدنا ابوہریرہ رضی اللہ عنہ نے دیوار کے بارے میں نبی اکرم صلی اللہ علیہ وسلم کا یہ ارشاد نقل کیا ہے ” وہ (یاجوج و ماجوج) روزانہ اس کو کھودیں گے، جب وہ بالکل گرنے والی ہو گی تو ان کا نگران ان سے کہے گا کہ اب واپس چلو اور جو بچ گئی ہے وہ کل کھودیں گے، اگلے دن اللہ تعالیٰ اس کو پوری کر دے گا اور وہ پہلے سے بھی زیادہ سخت ہو گی، ان کا سلسلہ یونہی چلتا رہے گا، جب ان کے نکلنے کا وہ وقت آ جائے گا جو اللہ تعالیٰ نے لکھ رکھا ہے تو شام کے وقت واپس لوٹتے ہوئے ان کا نگران کہے گا: اب جو بچ گئی ہے وہ ہم ” ان شاء اللہ تعالیٰ “ کل کھودیں گے، یہ لوگ واپس آ جائیں گے، اگلے دن جب اس دیوار کے پاس جائیں گے تو وہ اتنی ہی ہو گی جتنی کل شام چھوڑ کر گئے تھے، وہ دیوار توڑیں گے، اور لوگوں پر حملہ آور ہوں گے، یہ سب پانی پی جائیں گے، لوگ ان سے بھاگیں گے، یہ اپنے تیر آسمان کی جانب پھینکیں گے، وہ تیر خون آلود ہو کر واپس آئیں گے، یہ کہیں گے: ہم نے زمین والوں پر بھی غلبہ پا لیا ہے اور آسمان والوں پر بھی ہمیں غلبہ اور طاقت حاصل ہے۔ اللہ تعالیٰ ان کی گردن کی پچھلی جانب ایک کیڑا پیدا فرمائے گا جس کی وجہ سے یہ سب ہلاک ہو جائیں گے۔ پھر آپ نے فرمایا: اس ذات کی قسم جس کے قبضہ قدرت میں میری جان ہے، زمین کے جانور موٹے ہو جائیں گے، تروتازہ ہو جائیں گے، وہ اللہ کا شکر ادا کریں گے، اور ان کے گوشت کھانے سے نشہ آئے گا۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كتاب الفتن والملاحم/حدیث: 8711]