سیدنا طرفہ سلمی بیان کرتے ہیں کہ سیدنا علی رضی اللہ عنہ فرمایا کرتے تھے کہ جب حق کی باری آتی ہے تو اللہ تعالیٰ انسان کو شیطان پر غلبہ عطا فرماتا ہے اور جب باطل کی باری آتی ہے تو شیطان کو انسان پر غلبہ دیا جاتا ہے۔ ابلیس کو سجدے کا حكم دیا گیا، اس نے انکار کر دیا تو اس پر آدم علیہ السلام کو غلبہ دے دیا گیا۔ پھر دو آدمیوں میں سے ایک نے اپنے ساتھی کو قتل کیا تو اس پر ابلیس کو غلبہ دے دیا گیا۔ عنقریب بہت سارے فتنے ہوں گے، ایک فتنہ خاص ہو گا، پھر ایک فتنہ عام ہو گا، پھر ایک فتنہ خاص ہو گا، پھر ایک فتنہ عام ہو گا۔ آپ سے پوچھا گیا: اے امیرالمومنین! خاص فتنہ کیا ہو گا؟ اور عام فتنہ کیا ہو گا؟ پھر خاص فتنہ کیا ہو گا؟ اور اس کے بعد پھر عام فتنہ کیا ہو گا؟ آپ نے فرمایا: دو امام ہوں گے، ایک امام برحق ہو گا اور ایک امام باطل ہو گا، پھر حق سے باطل اور باطل سے حق کی جانب چلے گا۔ یہ فتنہ خاص ہو گا، اور دو امام مزید ہوں گے ایک امام برحق ہو گا اور ایک امام باطل ہو گا، پھر وہ حق سے باطل کی طرف اور باطل سے حق کی طرف پھر جائیں گے، یہ فتنہ عام ہو گا۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ اس حدیث کی وضاحت کرنے والے ابوعوانہ ہیں۔ [المستدرك على الصحيحين/كتاب الفتن والملاحم/حدیث: 8870]