عبداللہ بن زریر غافقی بیان کرتے ہیں کہ سیدنا علی بن ابی طالب رضی اللہ عنہ فرماتے ہیں: ایک فتنہ ایسا ہو گا جس سے لوگ اس طرح اکٹھے ہو جائیں گے جیسے کان میں سونا جمع ہوتا ہے۔ اہل شام کی گمراہی کو برا بھلا کہہ لینا لیکن وہاں کے لوگوں کی برائی نہ کرنا، کیونکہ ان لوگوں میں ابدال ہوں گے، عنقریب اللہ تعالیٰ آسمان سے ان پر بارش نازل فرمائے گا، وہ ان کو غرق کر دے گا، حتی کہ اگر لومڑیاں بھی ان سے قتال کریں تو وہ بھی ان پر غالب آ جائیں گی، پھر ان میں اللہ تعالیٰ ایک سید زادے کو بھیجے گا جو کہ کم از کم 12 ہزار اور زیادہ سے زیادہ 15 ہزار افراد کے ہمراہ ہو گا، ان کی نشانی (کوڈ ورڈ) اَمِت اَمِت ہو گی، یہ تین جھنڈوں کے ساتھ ہوں گے، ان کے ساتھ جس لشکر کی جنگ ہو گی دو سات جھنڈوں والا ہو گا، اور ہر علمبردار حکومت کا لالچی ہو گا، یہ لوگ ان سے جہاد کریں گے اور ان سب کو شکست فاش ہو گی۔ پھر ایک ہاشمی شخص ظاہر ہو گا، اللہ تعالیٰ لوگوں کے دلوں میں ان کی محبت ڈال دے گا، انہی حالات میں دجال ظاہر ہو جائے گا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب الفتن والملاحم/حدیث: 8871]