سیدنا ابوذر رضی اللہ عنہ سے روایت ہے، انہوں نے کہا کہ رسول اللہ صلی اللہ علیہ وسلم نے فرمایا: ”بے شک میں وہ دیکھتا ہوں جو تم نہیں دیکھتے، اور وہ سنتا ہوں جو تم نہیں سنتے۔ آسمان (بوجھ سے) چرچرا رہا ہے اور اسے حق ہے کہ وہ چرچرائے، اس میں چار انگلیوں کے برابر بھی کوئی ایسی جگہ نہیں ہے جہاں کسی فرشتے نے اللہ کے حضور سجدہ ریز ہو کر اپنی پیشانی نہ رکھی ہو۔ اللہ کی قسم! اگر تم وہ جان لو جو میں جانتا ہوں، تو تم ہنستے کم اور روتے زیادہ، تم بستروں پر عورتوں سے لذت اندوز نہ ہوتے، اور تم ٹیلوں اور کھلے میدانوں کی طرف نکل کر اللہ کے حضور آہ و زاری کرتے۔“ (یہ سن کر سیدنا ابوذر رضی اللہ عنہ نے فرمایا:) ”اللہ کی قسم! میری تو یہ تمنا ہے کہ میں ایک ایسا درخت ہوتا جسے کاٹ دیا جاتا۔“
یہ حدیث شیخین کی شرط پر صحیح الاسناد ہے لیکن انہوں نے اسے روایت نہیں کیا۔ [المستدرك على الصحيحين/كتاب : الأهوال/حدیث: 8941]