´(جہاد کے متعلق احادیث)`
سیدنا عمر رضی اللہ عنہ سے مروی ہے کہ انہوں نے سنا، رسول اللہ صلی اللہ علیہ وسلم فرما رہے تھے کہ ” میں یہود و نصاریٰ کو جزیرۃ العرب سے باہر نکال کر دم لوں گا۔ یہاں تک کہ عرب میں مسلمانوں کے علاوہ کسی ایک کو بھی نہیں چھوڑوں گا۔“ (مسلم) «بلوغ المرام/حدیث: 1118»

تخریج:
«أخرجه مسلم، الجهاد، باب إخراج اليهود والنصارٰي من جزيرة العرب، حديث:1767.» تشریح:
اس حدیث سے معلوم ہوا کہ نبی ٔاکرم صلی اللہ علیہ وسلم کی خواہش تھی کہ جزیرۃ العرب سے کافروں اور یہود و نصاریٰ کو باہر نکال دیں۔
آپ کی زندگی میں اس پر پوری طرح عمل نہ کیا جا سکا‘ تاہم حضرت عمر رضی اللہ عنہ نے نبی صلی اللہ علیہ وسلم کی خواہش اور آپ کے حکم (کہ عرب میں دو دین نہ رہیں) پرعمل درآمد کیا اور اپنے دور خلافت میں یہودیوں اور عیسائیوں کو جزیرۂ عرب سے جلا وطن کر دیا۔