´میت کے بوسہ لینے کا بیان۔`
ام المؤمنین عائشہ رضی اللہ عنہا کہتی ہیں کہ رسول اللہ صلی اللہ علیہ وسلم نے عثمان بن مظعون رضی اللہ عنہ ۱؎ کا بوسہ لیا، اور وہ مردہ تھے، گویا کہ میں نبی اکرم صلی اللہ علیہ وسلم کے آنسوؤں کو دیکھ رہی ہوں جو آپ کے رخسار مبارک پہ بہہ رہے تھے۔ [سنن ابن ماجه/كتاب الجنائز/حدیث: 1456]

اردو حاشہ:
فوائد و مسائل:
(1)
حضرت عثمان بن مظعون کبار صحابہ کرام رضوان للہ عنہم اجمعین میں سے ہیں۔
ان سے پہلے صرف تیرہ افراد اسلام لائے تھے۔
ہجرت حبشہ اور ہجرت مدینہ کے شرف سے مشرف ہوئے۔
جنگ بدر میں بھی شریک ہوئے۔
نواب وحید الزمان خاں نے لکھا ہے۔
کہ حضرت عثمان بن مظعون رسول اللہ ﷺکے دودھ شریک بھائی بھی تھے۔

(2)
غم کی وجہ سے رونا اور آنسو بہنا صبر کے منافی نہیں۔
بلکہ رحمت اور نرم دلی کی علامت ہے۔

(3)
مذکورہ روایت سنداً ضعیف ہے۔
رسول اللہ ﷺ سے میت کو بوسہ دینا ثابت نہیں البتہ حضرت ابو بکر صدیق رضی اللہ تعالیٰ عنہ نے نبی اکرمﷺ کو وفات کے بعد بوسہ دیا تھا۔
جیسا کہ آئندہ روایت میں مذکور ہے۔

´میت کے بوسہ لینے کا بیان۔`
ام المؤمنین عائشہ رضی الله عنہا کہتی ہیں کہ نبی اکرم صلی اللہ علیہ وسلم نے عثمان بن مظعون رضی الله عنہ کا بوسہ لیا - وہ انتقال کر چکے تھے - آپ رو رہے تھے۔ یا (راوی نے) کہا: آپ کی دونوں آنکھیں اشک بار تھیں ۱؎۔ [سنن ترمذي/كتاب الجنائز/حدیث: 989]

اردو حاشہ:
1؎:
یہ حدیث اس با ت پر دلالت کرتی ہے کہ مسلمان میت کو بوسہ لینا اور اس پر رونا جائز ہے،
رہیں وہ احادیث جن میں رونے سے منع کیا گیا ہے تو وہ ایسے رونے پر محمول کی جائیں گی جس میں بین اور نوحہ ہو۔

نوٹ:

(ملاحظہ ہو:
تراجع الألبانی 495)

´میت کو بوسہ دینا۔`
ام المؤمنین عائشہ رضی اللہ عنہا کہتی ہیں کہ میں نے رسول اللہ صلی اللہ علیہ وسلم کو عثمان بن مظعون ۱؎ رضی اللہ عنہ کو بوسہ لیتے ہوئے دیکھا ہے، ان کا انتقال ہو چکا تھا، میں نے دیکھا کہ آپ صلی اللہ علیہ وسلم کی آنکھوں سے آنسو بہہ رہے تھے۔ [سنن ابي داود/كتاب الجنائز /حدیث: 3163]

فوائد ومسائل:
مسلمان کبھی بھی نجس نہیں ہوتا۔
زندگی میں نہ موت کے بعد اور اپنی محبوب میت کو بوسہ دینا کسی طرح معیوب نہیں ہے۔
اور اس کے غم میں آنسئووں کا نکل آنا ایک فطری بات ہے۔
اس میں کوئی حرج نہیں۔