´نماز جمعہ کا بیان`
سیدنا سائب بن یزید رحمہ اللہ علیہ کا بیان ہے کہ سیدنا معاویہ رضی اللہ عنہ نے فرمایا جب تم نماز جمعہ پڑھو تو پھر دوسری کوئی نماز اس کے ساتھ نہ ملاؤ تاوقتیکہ تم سے کوئی بات کر لے یا وہاں سے نکل جائے۔ کیونکہ رسول اللہ صلی اللہ علیہ وسلم نے ہمیں اسی طرح حکم دیا تھا کہ ہم نماز جمعہ کے ساتھ دوسری نماز نہ ملائیں تاوقتیکہ ہم کوئی بات نہ کر لیں یا وہاں سے نکل جائیں۔ (مسلم) «بلوغ المرام/حدیث: 368»

تخریج:
«أخرجه مسلم، الجمعة، باب الصلاة بعد الجمعة، حديث:883.» تشریح:
1. اس حدیث سے ثابت ہوتا ہے کہ نماز جمعہ کے بعد اسی جگہ فوراً کھڑے ہو کر سنتیں نہیں پڑھنی چاہییں۔
یہ حکم صرف جمعہ کے ساتھ مخصوص نہیں بلکہ ہر نماز کے نفل اور فرض میں یہ فرق بذریعۂانتقالِ جگہ یا بذریعۂ گفتگو کر لینا چاہیے تاکہ نفل کی فرض سے مشابہت نہ ہو۔
2. نبی صلی اللہ علیہ وسلم نوافل و سنن بالعموم گھر پر ادا فرمایا کرتے تھے اور بہتر بھی یہی ہے۔
3. نوافل و فرائض ایک ہی جگہ نہ پڑھنے کی حکمت یہ بھی ہو سکتی ہے کہ مختلف جگہوں پر نماز پڑھنا نامۂ اعمال میں درج ہو جائے اور اجر و ثواب بھی زیادہ ملے۔
راویٔ حدیث:
«حضرت سائب بن یزید» ان کی کنیت مشہور قول کے مطابق ابویزید کندی ہے۔
۲ ہجری میں پیدا ہوئے۔
اپنے باپ کے ساتھ حجۃ الوداع میں شریک ہوئے۔
۸۰ ہجری میں فوت ہوئے۔