´عطاء بن ابی رباح`
«حَدَّثَنَا إِبْرَاهِيمُ بْنُ مُوسَى، أَخْبَرَنَا هِشَامٌ، عَنْ ابْنِ جُرَيْجٍ، وَقَالَ عَطَاءٌ: عَنْ ابْنِ عَبَّاسٍ رَضِيَ اللَّهُ عَنْهُمَا . . .»
”ہم سے ابراہیم بن موسیٰ نے بیان کیا، انہوں نے کہا ہم کو ہشام نے خبر دی، ان سے ابن جریج نے اور عطاء نے بیان کیا اور ان سے عبداللہ بن عباس رضی اللہ عنہما نے بیان کیا کہ . . .“ [صحيح البخاري/كِتَاب تَفْسِيرِ الْقُرْآنِ: 4920]

فقہ الحدیث
معترض (منکرین حدیث) کا اعتراض: تبصرہ:
میں کہتا ہوں کہ سند بخاری میں تو صرف یوں مرقوم ہے: «قال عطاء عن ابن عباس» ان عطاء کے خراسانی ہونے کی کیا دلیل ہے؟ بحالیکہ اس میں خراسانی کی کوئی تصریح نہیں ہے۔
میں کہتا ہوں کہ وہ عطا بن ابی رباح ہے، جس سے انقطاع کا شبہ بالکل مدفوع ہے۔ بناءِ ثبوت جب صرف اقوالِ شارحین پر ہی موقوف ہے، تو ہم سے سنئے: قسطلانی میں ہے:
«لكن البخاري ما أخرجه الاّ على أنه من رواية عطاء بن أبى رباح، لأن الخراساني ليس على شرطه، ولقائل أن يقول: هذا ليس بقاطع فى أنّ عطاء المذكور هو الخراساني فيحتمل أن يكون هذا الحديث عند ابن جريج عن الخراساني وابن ابي رباح جميعا» [283/7]
یعنی امام بخاری نے اس حدیث کو عطا بن ابی رباح کی روایت سے بیان کیا ہے، اس لئے کہ عطاء خراسانی ان کی شرط پر نہیں ہے، کہنے والا کہہ سکتا ہے کہ اس کے یقین ہونے کا کیا ثبوت ہے کہ یہ عطا خراسانی ہی ہے؟ بلکہ احتمال ہے کہ ابن جریج کے پاس، یہ حدیث عطاء خراسانی و عطاء بن ابی رباح ہر دو کی روایت سے ہو اور امام بخاری نے اس سے عطا بن ابی رباح مراد لیا ہو۔ (کیونکہ عطا خراسانی ان کی شرط پر نہیں ہے۔) «فإذا جاء الاحتمال بطل الاستدلال!»
↰ لہٰذا خراسانی کا تعین باطل ہو گیا۔

علامہ عینی سے اس کی بابت جو آپ نے «فيه نظر» کا جملہ نقل کیا ہے، اس میں خود نظر ہے، اس لیے کہ حالات رواۃ امام بخاری پر پوشیدہ نہ تھے، ہاں «فسبحان من لا يخفيٰ عليه شيء» تو تمام اشیائے موجودہ فی السماءوالارض وما تحت الثری کے متعلق ہے۔ جن کا جاننے والا اللہ تعالیٰ ہے، کیونکہ عالم الغیب وہی ہے۔

حافظ ابن حجر لکھتے ہیں:
«الذي قوي عندي أن هذا الحديث بخصوصه عند ابن جريج عن عطاء الخرساني وعن عطاء بن أبى رباح جميعا انتهي» [فتح الباري: 377/2]
”یعنی یہ حدیث خاص کر ابن جریح کے پاس عطاء خراسانی و عطا بن ابی رباح ہر دو کی سند سے ہے۔“
اور اس جواب کو علامہ عینی نے بھی نقل کیا ہے، جسے مولوی عمر کریم نے بھی اہل فقہ میں نقل کیا ہے، لیکن اس پر علامہ عینی کا احتمال امکان کہ یہ شاید امام بخاری پر پوشیدہ رہا ہو، بے ثبوت و خلاف ہداہت ہے۔ افسوس کے ایسے مہمل اور لایعنی اعتراضات سے معترض خود اپنی قلیل البضاعتی کا اظہار کرتے ہیں، اللہ ہدایت دے۔ آمین۔

4920. حضرت ابن عباس ؓ سے روایت ہے کہ جو بت حضرت نوح ؑ کی قوم میں پوجے جاتے تھے، بعد میں انہی کی عرب کے ہاں عبادت ہونے لگی، چنانچہ، ود، دومۃ الجندل میں بنو کلب کا بت تھا۔ سواع، بنو ہذیل کا اور یغوث مراد قبیلے کی شاخ بنو غطیف کا بت تھا جو وادی جرف میں قوم سبا کے پاس رہتے تھے۔ یعوق، بنو ہمدان کا بت تھا اور نسر کی قومِ حمیر عبادت کرتی تھی جو ذوالکلاع کی اولاد سے تھے۔ یہ پانچوں حضرت نوح ؑ کی قوم کے نیک لوگوں کے نام تھے۔ جب ان پر موت آئی تو شیطان نے ان کے دل میں ڈالا کہ جن مقامات پر یہ بزرگ تشریف فرمایا کرتے تھے وہاں ان کی مورتیاں بنا لو اور ان کا نام انہی بزرگوں کے نام پر رکھو، چنانچہ انہوں نے ایسا ہی کیا۔ اس وقت ان کی پوجا پاٹ نہیں ہوتی تھی لیکن جب وہ لوگ بھی مر گئے جنہوں نے بت قائم کیے تھے اور لوگوں میں علم نہ رہا تو ان کی پوجا پاٹ ہونے لگی۔ [صحيح بخاري، حديث نمبر:4920]

حدیث حاشیہ:
بت پرستی کی ابتدا جملہ بت پرستوں کی اقوام میں اس طرح شروع ہوئی کہ انہوں نے اپنے نیک لوگوں کے ناموں پربت بنا لئے۔
پہلے عبادت میں ان کو سامنے رکھنے لگے شیطان نے یہ فریب اس طرح چلایا کہ ان بتوں کے دیکھنے سے بزرگوں کی یاد تازہ رہے گی اور عبادت میں دل لگے گا، رفتہ رفتہ وہ بت ہی خود معبود بنا لئے گئے۔
تمام بت پرستوں کا آج تک یہی حال ہے پس دنیا میں بت پرستی یوں شروع ہوئی۔
اسی لئے اسلامی شریعت میں اللہ تعالیٰ نے بت اورصورت کے بنانے سے منع فرما دیا اور یہ حکم دیا کہ جہاں بت یا صورت دیکھو اس کو توڑ پھوڑ کر پھینک دو کیونکہ یہ چیزیں اخیر میں شرک کا ذریعہ ہو گئیں اسلامی شریعت میں یاد گار کے لئے بھی بت یا صورت کا بنانا درست نہیں اور کوئی کتنے ہی مقدس پیغمبر یا اوتار کی صورت ہو اس کی کوئی عزت یا حرمت نہیں کرنا چاہئے کیونکہ وہ صرف ایک مورت ہے جس کا اسلام میں کوئی وزن نہیں۔
مسلمانوں کو ہمیشہ اپنے اس اصول مذہبی کا خیال رکھنا چاہئے اور کسی بادشاہ یا بزرگ کے بت بنانے میں ان کا بالکل مدد نہ کرنا چاہئے، اللہ تعالیٰ فرماتا ہے وتعاونوا علی البر والتقویٰ ولا تعاونوا علی الاثم والعدوان (المائدة: 2) (وحیدی)
مگر یہ کس قدر افسوسناک حرکت ہے کہ بعض تعزیہ پرست حضرات تعزیہ کے ساتھ حضرت فاطمۃ الزہراء کی کاغذی صورت بنا کر تعزیہ کے آگے رکھتے اور اس کا پورا ادب بجا لاتے ہیں۔
کتنے نام نہاد مسلمانوں نے مزار اولیاء کے فوٹو لے کر ان کو گھروں میں رکھا ہوا ہے اور صبح اور شام ان کو معطر کرکے ان پر پھول چڑھاتے اور ان کی تعظیم کرتے ہیں یہ جملہ حرکات بت سازی اور بت پرستی ہی کی شکلیں ہیں۔
اللہ پاک مسلمانوں کو نیک سمجھ عطا کرے کہ وہ ایسی حرکتوں سے باز رہیں ورنہ میدان محشر میں سخت ترین رسوائی کے لئے تیار رہیں۔

4920. حضرت ابن عباس ؓ سے روایت ہے کہ جو بت حضرت نوح ؑ کی قوم میں پوجے جاتے تھے، بعد میں انہی کی عرب کے ہاں عبادت ہونے لگی، چنانچہ، ود، دومۃ الجندل میں بنو کلب کا بت تھا۔ سواع، بنو ہذیل کا اور یغوث مراد قبیلے کی شاخ بنو غطیف کا بت تھا جو وادی جرف میں قوم سبا کے پاس رہتے تھے۔ یعوق، بنو ہمدان کا بت تھا اور نسر کی قومِ حمیر عبادت کرتی تھی جو ذوالکلاع کی اولاد سے تھے۔ یہ پانچوں حضرت نوح ؑ کی قوم کے نیک لوگوں کے نام تھے۔ جب ان پر موت آئی تو شیطان نے ان کے دل میں ڈالا کہ جن مقامات پر یہ بزرگ تشریف فرمایا کرتے تھے وہاں ان کی مورتیاں بنا لو اور ان کا نام انہی بزرگوں کے نام پر رکھو، چنانچہ انہوں نے ایسا ہی کیا۔ اس وقت ان کی پوجا پاٹ نہیں ہوتی تھی لیکن جب وہ لوگ بھی مر گئے جنہوں نے بت قائم کیے تھے اور لوگوں میں علم نہ رہا تو ان کی پوجا پاٹ ہونے لگی۔ [صحيح بخاري، حديث نمبر:4920]

حدیث حاشیہ:
1۔
بت پرست اقوام میں بت پرستی کا آغاز اسی طرح ہوا کہ قوم میں جو نیک لوگ ہوا کرتے تھے جب وہ فوت ہو گئے تو شیطان نے دوسرے لوگوں کے دلوں میں یہ بات ڈال دی کہ جن مقامات پر یہ بزرگ حضرات بیٹھا کرتے تھے۔
تم وہاں ان کی مورتیاں بنا کر رکھ دو تا کہ ان کے کارنامےتمھیں یاد آئیں اور تم ان کی پیروی میں سستی نہ کرو۔
اگر تم نے ان کی مورتیاں بنا کر نہ رکھیں تو تم انھیں بھلا بیٹھو گے اور صراط مستقیم پر چلنے کے لیے تمھارے سامنے کوئی نمونہ نہیں ہو گا، چنانچہ لوگوں نے ایسا ہی کیا اس وقت مورتیاں بنانے والوں کے عقائد درست تھے۔
جب ان کی وفات ہو گئی اور ان کی اولاد میں علم باقی نہ رہا تو ان مورتیوں کی عبادت ہونے لگی اس لیے ہماری شریعت میں بت اور تصویر کشی منع ہے بلکہ یہ حکم ہے کہ جہاں بت یا تصویر نظر آئے اسے توڑ دیا جائے کیونکہ یہ چیزیں آخر کار شرک کا ذریعہ بن جاتی ہیں اس دین میں یاد گار کے طور پر بھی بت یا تصویر بنانا منع ہے۔
2۔
اب یہاں ایک سوال پیدا ہوتا ہے کہ ان بتوں کے پجاری مشرک تو طوفان نوح میں غرق ہو گئے تھے اور جو باقی بچے تھے وہ سب موحد اور مومن تھے، پھر اس کے بعد ان کی پوجا کیسے شروع ہو گئی؟ اس کا جواب یہ ہے کہ جس طرح شیطان نے پہلے لوگوں کو دھوکے اور فریب سے نیک لوگوں کی پرستش پر لگا دیا تھا۔
شیطان کی وہی چال بعد میں بھی کامیاب رہی۔
موحدین نے اپنی اولاد کو طوفان نوح کا قصہ بتایا چند پشتیں گزرنے کے بعد پھر ان بتوں سے لوگوں کی عقیدت پیدا ہو گئی پھر ان کی عبادت ہونے لگی۔
واللہ اعلم۔