´ایمان کے مزہ کا بیان۔`
انس بن مالک رضی اللہ عنہ کہتے ہیں کہ رسول اللہ صلی اللہ علیہ وسلم نے فرمایا: ”تین چیزیں جس میں ہوں گی، وہ ایمان کی مٹھاس اور اس کا مزہ پائے گا، ایک یہ ہے کہ اللہ اور اس کے رسول اس کے نزدیک سب سے زیادہ محبوب و پسندیدہ ہوں، دوسرے یہ کہ آدمی محبت کرے تو اللہ کے لیے اور نفرت کرے تو اللہ کے لیے، تیسرے یہ کہ اگر بڑی آگ بھڑکائی جائے تو اس میں گرنا اس کے نزدیک زیادہ محبوب ہو بہ نسبت اس کے کہ وہ اللہ تعالیٰ کے ساتھ کسی کو شریک کرے“ ۱؎۔ [سنن نسائي/كتاب الإيمان وشرائعه/حدیث: 4990]

اردو حاشہ:
(1) ”ایمان کا مزہ“ یہ تجرباتی چیز ہے کہ جب انسان ایمان میں کھب جائے تو اسے ایمان کے کاموں میں اسی طرح لذت محسوس ہوتی ہے،جیسے عوام الناس کو کھانے، پینے اور نازونعمت کی دیگر چیزوں میں لذت محسوس ہوتی ہے اور وہ ایمان کی وجہ سے اپنے آپ کو اس طرح خوش نصیب تصور کرتا ہے جس طر ح ما لدار شخص اپنے مال کی وجہ سے اپنے آپکوخوش قسمت ستجھتا ہے۔لیکن یہ اس سے کہیں زیادہ اونچا مرتبہ ہے۔ اگر چہ نسبت خاک رابا عالم پاک!
(2) ”پیارے ہوں“ یعنی ان کو ہر چیز پر ترجیح دے مال اور حتیٰ کہ اپنی جان اور خواہش پر بھی۔نتیجہ یہ ہوگا کہ وہ اللہ اور اسکے رسول صلی اللہ علیہ وسلم کی اطاعت کے مقابلے میں ہر چیز کو رج کر دے گا حتی ٰ کہ اپنی ہواہش سے بھی دستبردار ہو جائے گا۔
(3) ”اللہ تعالی کے لیے ہو“ یعنی اس کے پیش نظر اپنا مفاد ونقصان نہ ہو بلکہ محبت اس لیے کہ اللہ تعالی اور اس کارسول صلی اللہ علیہ وسلم سے پسند کرتے ہیں اور ناراضی اس لیے کہ اللہ اور اس کا رسول اس کو ناپسند کرتے ہیں۔
(4) ”بھڑکتی آگ“ یعنی شرک سے اسے شدید نفرت ہو جائے حتی کہ جان جانے کا خطرہ ہو تب بھی شرک نہ کر ے۔
(5) یہ تینوں کام بڑے مشکل ہیں۔ کوئی صاحب ایمان ہی ان پر کار بندرہ سکتا ہے۔اللهم اجعلنا منهم۔