92- سیدنا عبداللہ بن مسعود رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا ہے: ”اے خواتین کے گروہ! تم صدقہ کیا کرو خواہ تم اپنے زیور ہی صدقہ کرو، کیونکہ اہل جہنم کی اکثریت تمہاری ہے۔“ تو ایک عورت کھڑی ہوئی جو کسی بڑے خاندان کی نہیں تھی اس نے عرض کی: یا رسول اللہ صلی اللہ علیہ وسلم! اس کی وجہ کیا ہے؟ نبی اکرم صلی اللہ علیہ وسلم نے فرمایا: ”اس کی وجہ یہ ہے کہ تم خواتین لعنت بکثرت کرتی ہو اور شوہر کی ناشکری کرتی ہو۔“ پھر سیدنا عبداللہ رضی اللہ عنہ نے فرمایا: ایسی کوئی مخلوق نہیں پائی گئی، جو عقل اور دین کے اعتبار سے ناقص ہو لیکن سمجھدار مردوں کے معاملات میں ان پر۔۔۔۔ (مکمل حدیث اس نمبر پر پڑھیے۔) [مسند الحمیدی/حدیث نمبر:92]

فائدہ:
اس حدیث میں صدقے کی اہمیت بیان کی گئی ہے۔ اس میں مرد وعورت دونوں شامل ہیں، اگر چہ یہ خطاب صرف عورتوں ہی کو تھا۔ عورتوں کی تعلیم و تربیت کا خاص خیال کرنا چاہیے۔ انھیں دینی علوم و فنون پڑھائے جائیں تا کہ ان میں اللہ تعالیٰ کا ڈر پیدا ہو، اور وہ جہنم سے بچ سکیں۔ خواتین میں دو بری خصلتیں عام ہوتی ہیں: ① لعنت کرنا۔ ② خاوندوں کی ناشکری کرنا، اور یہ دونوں بدترین حصلتیں ہیں۔ مرد عورتوں سے طاقت ور ہیں، اور دین اور عقل کے لحاظ سے عورتوں پر فائق ہیں۔ یہی وجہ ہے کہ نبوت کا عظیم شرف مردوں کے حصے میں آیا ہے نہ کہ عورتوں کے حصے میں۔ اسی طرح قیادت و سیادت کا اہل بھی مرد ہیں نہ کہ عورتیں۔ یہ بھی حقیقت ہے کہ کم عقل اور کم علم جب اہل علم سے جھگڑا کرتا ہے، تو اہل علم مہذب ہوتا ہے، لیکن کم علم حماقتوں سے بھری باتیں کرتا ہے، اس لیے غالب رہتا ہے، یہی صورت حال عورتوں کی ہے۔ عورت حالت حیض میں نماز نہیں پڑھے گی، اور نہ ہی روزہ رکھے گی لیکن بعد میں روزوں کی قضائی دے گی، جبکہ نماز کی قضائی نہیں دے گی۔ جب یہ بات ثابت شدہ ہے کہ عورتیں کم عقل ہیں، تو اس لیے ان کی تعلیم و تربیت اشد ضروری ہے۔ افسوس کہ ان کی اخلاقیات کو سکولوں و کالجز میں مزید خراب کیا جارہا ہے، اور ایسی خطرناک صورت حال بن چکی ہے کہ جس کو بیان کرنے کی قلم اجازت نہیں دیتا۔