´روزے کی فضیلت کا بیان۔`
قبیلہ عامر بن صعصعہ کے مطرف نامی ایک فرد بیان کرتے ہیں کہ عثمان بن ابی العاص ثقفی رضی اللہ عنہ نے انہیں پلانے کے لیے دودھ منگایا، تو انہوں نے کہا کہ میں روزے سے ہوں، اس پر عثمان رضی اللہ عنہ نے کہا: میں نے رسول اللہ صلی اللہ علیہ وسلم کو فرماتے سنا ہے: ”روزہ جہنم سے ڈھال ہے جیسے تم میں سے کسی کے پاس لڑائی میں ڈھال ہوتی ہے۔‏‏‏‏“ [سنن ابن ماجه/كتاب الصيام/حدیث: 1639]

اردو حاشہ:
فوائد و مسائل:
(1)
مہمان کو کھانے پینے کی چیز پیش کرنا اخلاق عالیہ میں شامل ہے۔

(2)
اگر کھانے پینے کی دعوت دی جائے، تو نفلی روزہ رکھ کر دعوت قبول کرنا ضروری نہیں۔

(3)
اگر کسی موقع پر ا پنی کوئی نیکی ظاہر کرنی پڑ جائے تو یہ ریا میں شامل نہیں۔

(4)
روزہ دوزخ سے بچاتا ہے۔
ایک تو اس کےلئے یہ ایک بڑی نیکی ہے۔
جس کی وجہ سے بہت سے گناہ معاف ہوجاتے ہیں۔
دوسرا اس لئے کہ روزے کی وجہ سے انسان بہت سے گناہوں سے بچ جاتا ہے۔
جن کے ارتکاب کی صورت میں وہ جہنم میں جا سکتا ہے۔
گناہوں سے اجتناب اور نیک عمل کی انجام دہی دونوں چیزیں جنت میں لے جانے والی اور جہنم سے بچانے والی ہیں۔