´عورتوں سے دبر میں جماع کرنے کی ممانعت۔`
جابر بن عبداللہ رضی اللہ عنہما کہتے ہیں کہ یہود کہتے تھے کہ جس نے بیوی کی اگلی شرمگاہ میں پیچھے سے جماع کیا تو لڑکا بھینگا ہو گا، چنانچہ اللہ سبحانہ نے یہ آیت کریمہ نازل فرمائی: «نساؤكم حرث لكم فأتوا حرثكم أنى شئتم» (سورة البقرة: 223) ”تمہاری بیویاں تمہاری کھیتیاں ہیں، لہٰذا تم اپنی کھیتیوں میں جدھر سے چاہو آؤ“ ۱؎۔ [سنن ابن ماجه/كتاب النكاح/حدیث: 1925]

اردو حاشہ:
فوائد و مسائل:
(1)
مباشرت کے لیے کوئی بھی طریقہ اختیار کرنا جائز ہے، خواہ عورت چت لیٹی ہوئی ہو یا پیٹ کے بل یا کروٹ پر تاہم یہ ضروری ہے کہ صرف وہی راستہ اختیار کیا جائے جس کی شرع نے اجازت دی ہے یعنی صرف عورت کی قبل (اگلی شرمگاہ)
استعمال کی جائے۔

(2)
عورت سے صنفی تعلق کا اہم مقصد اولاد کا حصول ہے، اسی لیے عورت کو کھیتی سے تشبیہ دی گئی ہے۔
مرد کسان کی طرح اس زمین میں بیج بوتا ہے جس سے اسے اولاد کی نعمت حاصل ہوتی ہے۔
اس سے بھی ثابت ہوتا ہے کہ عورت سے غيرفطری فعل کرنا جائز نہیں کیونکہ کھیت سے باہر جوہڑ وغیرہ میں بیج پھینک دینا حماقت ہے۔

(3)
﴿أَنَّىٰ شِئْتُمْ﴾ کا مطلب ”جہاں سے چاہو“ بھی کیا جائے تو بھی غیر فطری عمل کا جواز ثابت نہیں ہوتا۔
کیونکہ صرف (حرث)
”کھیتی کی جگہ“ میں آنے کا حکم دیا گیا ہے کسی اور جگہ نہیں خواہ براہ راست آگے سے آئے یا پیچھے سے ہو کر آگے آئے۔

(4)
معاشرے میں موجود توہمات کی تردید کر کے حقیقت واضح کرتے رہنا چاہیے۔