´اوندھے منہ لیٹنا منع ہے۔`
ابوذر رضی اللہ عنہ کہتے ہیں کہ نبی اکرم صلی اللہ علیہ وسلم میرے پاس سے گزرے اس حال میں کہ میں پیٹ کے بل لیٹا ہوا تھا، تو آپ صلی اللہ علیہ وسلم نے مجھے اپنے پیر سے ہلا کر فرمایا: ” «جنيدب» ! (یہ ابوذر کا نام ہے) سونے کا یہ انداز تو جہنمیوں کا ہے“ ۱؎۔ [سنن ابن ماجه/كتاب الأدب/حدیث: 3724]

اردو حاشہ:
فوائد ومسائل:

(1)
پیٹ کے بل لیٹنا ممنوع ہے۔

(2)
نبی اکرم ﷺ کے مقام و مرتبہ اور صحابہ کرام ﷺ کے دل میں نبی ﷺ کی محبت و عظمت کے پیش نظر رسول اللہ ﷺ کے لیے تنبیہ کا یہ انداز مناسب تھا لیکن عام آدمی کے لیے یہ مناسب نہیں کہ اپنے ساتھی کو ٹھوکر مار کر مسئلہ بتائے۔

(3)
مناسب موقع پر مناسب انداز سے سختی کرنا جائز ہے۔

(4)
سختی کا انداز ایسا ہونا چاہیے جس سے مخاطب کو یہ احساس ہو کہ اس تنبیہ میں محبت اور رہنمائی کا پہلو بھی شامل ہے، محض غصہ نکالنا مقصود نہیں۔