حضرت عمرہ بنت عبدالرحمن رحمہا اللہ بیان کرتی ہیں کہ حضرت زیاد بن ابوسفیان رحمہ اللہ نے حضرت عائشہ رضی اللہ عنہا کو لکھا کہ ابن عباس رضی اللہ عنہما کہتے ہیں جو شخص مکہ مکرمہ کی طرف قربانی کا جانور بھیج دے اس پر ہر وہ چیز حرام ہو جاتی ہے جو حج کرنے والے پر حرام ہوتی ہے تاآنکہ اس جانور کو ذبح کر دیا جائے۔ عمرہ رحمہا اللہ کہتی ہیں، اس پر حضرت عائشہ رضی اللہ عنہا نے فرمایا: جو ابن عباس رضی اللہ عنہما نے کہا وہ درست نہیں ہے کیونکہ میں نے رسول اللہ صلی اللہ علیہ وسلم کی ہدی (قربانی) کے ہار خود اپنے ہاتھ سے تیار کیے، پھر رسول اللہ صلی اللہ علیہ وسلم نے اپنے ہاتھوں سے ان قلادوں کو پہنایا اور میرے والد محترم کے ساتھ انہیں روانہ کیا مگر کوئی چیز جو اللہ تعالیٰ نے رسول اللہ صلی اللہ علیہ وسلم کے لیے حلال کی تھی وہ حرام نہیں ہوئی تاآنکہ اس ہدی کو ذبح کر دیا گیا۔ [صحيح البخاري/كتاب الحج/حدیث: 1700]

حضرت عائشہ رضی اللہ عنہا سے روایت ہے، انہوں نے فرمایا کہ میں نے نبی صلی اللہ علیہ وسلم کی قربانیوں کے ہار اپنے ہاتھ سے تیار کیے۔ آپ صلی اللہ علیہ وسلم نے خود ان کے گلوں میں ہار ڈالے اور ان کا اشعار کیا، پھر انہیں مکہ مکرمہ روانہ کیا۔ ایسا کرنے سے آپ صلی اللہ علیہ وسلم پر کوئی چیز حرام نہ ہوئی جو آپ صلی اللہ علیہ وسلم کے لیے پہلے حلال تھی۔ [صحيح البخاري/كتاب الحج/حدیث: 1696]

حضرت عائشہ رضی اللہ عنہا سے روایت ہے، انہوں نے فرمایا کہ رسول اللہ صلی اللہ علیہ وسلم مدینہ طیبہ سے قربانی بھیجتے اور میں ان کے لیے ہار خود تیار کرتی، پھر آپ صلی اللہ علیہ وسلم کسی چیز سے پرہیز نہ کرتے جس سے محرم اجتناب کرتا ہے۔ [صحيح البخاري/كتاب الحج/حدیث: 1698]

حضرت عائشہ رضی اللہ عنہا سے روایت ہے، انہوں نے فرمایا کہ میں نے نبی صلی اللہ علیہ وسلم کی ہدی کے لیے ہار تیار کیے۔ پھر آپ صلی اللہ علیہ وسلم نے ان کا اشعار کیا اور انہیں قلادہ پہنایا۔ پھر آپ صلی اللہ علیہ وسلم نے انہیں بیت اللہ روانہ کیا اور خود مدینہ طیبہ میں ٹھہرے۔ اس عمل سے آپ صلی اللہ علیہ وسلم پر کوئی ایسی چیز حرام نہ ہوئی جو آپ صلی اللہ علیہ وسلم کے لیے حلال تھی، یعنی آپ صلی اللہ علیہ وسلم محرم نہ ہوئے۔ [صحيح البخاري/كتاب الحج/حدیث: 1699]

حضرت عائشہ رضی اللہ عنہا ہی سے ایک دوسری روایت ہے، انہوں نے فرمایا کہ میں نبی صلی اللہ علیہ وسلم کی بکریوں کے لیے ہار تیار کرتی، آپ انہیں مکہ روانہ کر دیتے اور خود احرام کے بغیر رہتے تھے۔ [صحيح البخاري/كتاب الحج/حدیث: 1703]

حضرت عائشہ رضی اللہ عنہا سے ایک اور روایت ہے، انہوں نے فرمایا کہ میں نے نبی صلی اللہ علیہ وسلم کی ہدی (قربانی) کے لیے آپ کے احرام باندھنے سے پہلے ہار تیار کیے۔ [صحيح البخاري/كتاب الحج/حدیث: 1704]

حضرت عائشہ رضی اللہ عنہا سے روایت ہے، انہوں نے فرمایا کہ رسول اللہ صلی اللہ علیہ وسلم کی قربانیوں کے ہار میں نے اپنے ہاتھوں سے تیار کیے۔ پھر رسول اللہ صلی اللہ علیہ وسلم نے انہیں اپنے ہاتھوں سے ان کے گلے میں ڈالا۔ اس کے بعد آپ صلی اللہ علیہ وسلم نے میرے والد گرامی (حضرت ابوبکر رضی اللہ عنہ) کے ہمراہ انہیں مکہ مکرمہ روانہ کیا لیکن رسول اللہ صلی اللہ علیہ وسلم پر کوئی چیز حرام نہ ہوئی جو اللہ تعالیٰ نے آپ کے لیے حلال کی تھی تاآنکہ ان قربانیوں کو ذبح کر دیا گیا۔ [صحيح البخاري/كتاب الحج/حدیث: 2317]

حضرت مسروق رحمہ اللہ سے روایت ہے کہ وہ حضرت عائشہ رضی اللہ عنہا کی خدمت میں حاضر ہوئے اور عرض کی: ”ام المومنین! اگر کوئی شخص اپنی قربانی کعبہ بھیجے اور خود اپنے شہر میں ٹھہرا رہے، لے جانے والے کو وصیت کر دے کہ جانور کے گلے میں قلادہ (ہار) ڈال دیا جائے تو کیا وہ محرم ہو جائے گا یہاں تک کہ دوسرے لوگ احرام کھول دیں؟“ مسروق رحمہ اللہ کہتے ہیں کہ میں نے پسِ پردہ آپ کے ہاتھ مارنے کی آواز سنی۔ حضرت عائشہ رضی اللہ عنہا نے فرمایا: ”میں رسول اللہ صلی اللہ علیہ وسلم کی قربانی کے ہار بنایا کرتی تھی، آپ صلی اللہ علیہ وسلم جب اپنی قربانی کعبہ بھیجتے لیکن لوگوں کے واپس آنے تک آپ صلی اللہ علیہ وسلم پر کوئی چیز حرام نہ ہوتی تھی جو ان کے گھر کے دوسرے افراد پر حلال ہو۔“ [صحيح البخاري/كتاب الحج/حدیث: 5566]