حضرت انس رضی اللہ عنہ سے روایت ہے انہوں نے فرمایا کہ نبی کریم صلی اللہ علیہ وسلم تمام لوگوں سے زیادہ خوب صورت، سب لوگوں سے زیادہ بہادر اور سب سے زیادہ فیاض تھے۔ (ایک رات ایسا ہوا کہ) اہل مدینہ خوف زدہ ہوئے تو نبی کریم صلی اللہ علیہ وسلم گھوڑے پر سوار ہو کر سب سے پہلے آئے اور فرمایا: ”(فکر کی کوئی بات نہیں) البتہ ہم نے اس گھوڑے کو سمندر کی طرح رواں دواں پایا۔“ [صحيح البخاري/كتاب الجهاد والسير/حدیث: 2820]

حضرت انس رضی اللہ عنہ سے روایت ہے، انہوں نے کہا: ایک دفعہ مدینہ طیبہ میں دشمن کا خوف سا پیدا ہوا تو نبی صلی اللہ علیہ وسلم نے حضرت ابو طلحہ رضی اللہ عنہ سے ایک گھوڑا مستعار لیا جسے مندوب کہا جاتا تھا۔ آپ اس پر سوار ہوئے۔ جب واپس تشریف لائے تو فرمایا: ”کوئی گڑبڑ نہیں ہے، یہ گھوڑا تو سمندر کی موج ہے۔“ [صحيح البخاري/كتاب الجهاد والسير/حدیث: 2627]

حضرت انس رضی اللہ عنہ سے روایت ہے، انہوں نے کہا کہ ایک رات مدینہ طیبہ میں کچھ دہشت سی طاری ہوئی تو نبی صلی اللہ علیہ وسلم نے ہمارا ایک گھوڑا مستعار لیا جسے مندوب کہا جاتا تھا، پھر آپ صلی اللہ علیہ وسلم نے فرمایا: ”ہم نے تو کوئی خوف کی بات نہیں دیکھی، البتہ ہم نے اس گھوڑے کو سمندر کی طرح (خوب تیز رو) پایا ہے۔“ [صحيح البخاري/كتاب الجهاد والسير/حدیث: 2857]

حضرت انس بن مالک رضی اللہ عنہ سے روایت ہے، انہوں نے کہا کہ مدینہ طیبہ میں ایک دفعہ خوف طاری ہوا تو نبی صلی اللہ علیہ وسلم نے حضرت ابو طلحہ رضی اللہ عنہ سے گھوڑا مستعار لیا جسے مندوب کہا جاتا تھا۔ پھر آپ صلی اللہ علیہ وسلم اس پر سوار ہوئے اور فرمایا: ”خوف و ہراس کی کوئی بات ہم نے نہیں دیکھی، بلاشبہ اس (گھوڑے) کو ہم نے (روانی میں) دریا ہی پایا ہے۔“ [صحيح البخاري/كتاب الجهاد والسير/حدیث: 2862]

حضرت انس رضی اللہ عنہ سے روایت ہے کہ نبی صلی اللہ علیہ وسلم گھوڑے کی ننگی پیٹھ پر، جس پر زین نہیں تھی، سوار ہو کر صحابہ کرام رضی اللہ عنہم سے آگے نکل گئے تھے اور آپ صلی اللہ علیہ وسلم کی گردن مبارک میں تلوار لٹک رہی تھی۔ [صحيح البخاري/كتاب الجهاد والسير/حدیث: 2866]

حضرت انس رضی اللہ عنہ سے روایت ہے کہ ایک مرتبہ اہل مدینہ کو کوئی خطرہ محسوس ہوا تو نبی صلی اللہ علیہ وسلم حضرت ابو طلحہ رضی اللہ عنہ کے گھوڑے پر سوار ہوئے۔ وہ گھوڑا سست رفتار تھا یا اس کی رفتار میں سستی تھی۔ پھر جب آپ واپس آئے تو فرمایا: ”ہم نے تو آپ کے اس گھوڑے کو (روانی میں) دریا جیسا پایا ہے۔“ چنانچہ اس کے بعد کوئی گھوڑا اس سے آگے نہیں نکل سکتا تھا۔ [صحيح البخاري/كتاب الجهاد والسير/حدیث: 2867]

حضرت انس رضی اللہ عنہ سے روایت ہے، انہوں نے فرمایا: نبی کریم صلی اللہ علیہ وسلم تمام لوگوں سے زیادہ خوبصورت اور دلیر تھے۔ ایک رات اہل مدینہ پر سخت خوف و ہراس طاری ہوا تو وہ خوفناک آواز کی طرف نکلے۔ نبی کریم صلی اللہ علیہ وسلم سب سے پہلے آگے روانہ ہوئے اور واقعے کی تحقیق کی۔ آپ اس وقت حضرت ابو طلحہ رضی اللہ عنہ کے ایسے گھوڑے پر سوار تھے جس پر زین نہیں تھی۔ آپ صلی اللہ علیہ وسلم نے اپنے گلے میں تلوار لٹکائی ہوئی تھی اور فرما رہے تھے: ”مت گھبراؤ، تمہیں گھبرانے کی کوئی ضرورت نہیں۔“ پھر آپ صلی اللہ علیہ وسلم نے فرمایا: ”ہم نے اس گھوڑے کو سمندر (کی طرح سبک رفتار) پایا۔“ یا (یہ) فرمایا: ”بلاشبہ یہ (گھوڑا) سمندر ہے۔“ [صحيح البخاري/كتاب الجهاد والسير/حدیث: 2908]

حضرت انس رضی اللہ عنہ سے روایت ہے، انہوں نے کہا کہ ایک دفعہ مدینہ طیبہ میں خوف و ہراس پھیلا تو رسول اللہ صلی اللہ علیہ وسلم نے حضرت ابو طلحہ رضی اللہ عنہ کے گھوڑے پر سوار ہو کر خود پیش قدمی کی اور واپس آکر فرمایا: ”ہم نے تو وہاں کچھ نہیں دیکھا، البتہ اس گھوڑے کو دریا جیسا پایا ہے۔“ [صحيح البخاري/كتاب الجهاد والسير/حدیث: 2968]

حضرت انس رضی اللہ عنہ سے روایت ہے، انہوں نے کہا: ایک دفعہ لوگوں میں خوف و ہراس پھیلا تو رسول اللہ صلی اللہ علیہ وسلم تن تنہا حضرت ابو طلحہ رضی اللہ عنہ کے ایک سست رفتار گھوڑے پر سوار ہوئے۔ پھر آپ صلی اللہ علیہ وسلم نے باہر نکل کر اسے ایڑی لگائی، آپ کے پیچھے لوگوں نے بھی گھوڑے دوڑائے۔ آپ صلی اللہ علیہ وسلم نے (واپسی پر) فرمایا: ”گھبرانے کی ضرورت نہیں۔ البتہ یہ گھوڑا تو دریا جیسا ہے۔“ چنانچہ وہ گھوڑا اس کے بعد کبھی پیچھے نہیں رہا۔ [صحيح البخاري/كتاب الجهاد والسير/حدیث: 2969]

حضرت انس رضی اللہ عنہ سے روایت ہے، انہوں نے کہا کہ رسول اللہ صلی اللہ علیہ وسلم سب لوگوں سے زیادہ خوبصورت، سب سے زیادہ سخی اور سب سے زیادہ بہادر تھے، چنانچہ ایک دفعہ اہل مدینہ خوفزدہ ہوئے، جب انہوں نے ایک ہولناک آواز سنی تو نبی کریم صلی اللہ علیہ وسلم حضرت ابو طلحہ رضی اللہ عنہ کے گھوڑے کی ننگی پیٹھ پر سوار ہوئے جبکہ آپ صلی اللہ علیہ وسلم اپنے گلے میں تلوار لٹکائے ہوئے تھے۔ آپ صلی اللہ علیہ وسلم نے لوگوں سے فرمایا: «لَنْ تُرَاعُوا، لَنْ تُرَاعُوا» ”مت گھبراؤ، پریشان ہونے کی ضرورت نہیں۔“ پھر رسول اللہ صلی اللہ علیہ وسلم نے فرمایا: «إِنْ وَجَدْنَاهُ لَبَحْرًا» ”میں نے (سبک رفتاری میں) اس گھوڑے کو دریا کی طرح پایا ہے۔“ [صحيح البخاري/كتاب الجهاد والسير/حدیث: 3040]

حضرت انس رضی اللہ عنہ سے روایت ہے انہوں نے کہا کہ نبی کریم صلی اللہ علیہ وسلم سب سے زیادہ خوبصورت، سب سے زیادہ سخی اور سب سے زیادہ بہادر تھے، اہل مدینہ ایک رات خوف و ہراس میں مبتلا ہوئے تو وہ شور کی طرف بڑھے لیکن نبی کریم صلی اللہ علیہ وسلم ان کو آگے سے ملے کیونکہ آپ صلی اللہ علیہ وسلم اٹھنے والے شور و غل کی طرف سب سے پہلے تشریف لے گئے تھے۔ آپ صلی اللہ علیہ وسلم نے فرمایا: «لَنْ تُرَاعُوا، لَنْ تُرَاعُوا» ”گھبراؤ نہیں، کوئی خطرے کی بات نہیں۔“ آپ صلی اللہ علیہ وسلم اس وقت حضرت ابو طلحہ رضی اللہ عنہ کے گھوڑے کی ننگی پیٹھ پر سوار تھے، اس پر کوئی زین وغیرہ نہ تھی، آپ صلی اللہ علیہ وسلم کی گردن میں تلوار آویزاں تھی، اس وقت آپ صلی اللہ علیہ وسلم نے فرمایا: «إِنْ وَجَدْنَاهُ لَبَحْرًا» ”میں نے اس گھوڑے کو روانی میں سمندر کی طرح پایا۔“ یا فرمایا: ”یہ گھوڑا (تیز رفتاری میں) گویا سمندر ہے۔“ [صحيح البخاري/كتاب الجهاد والسير/حدیث: 6033]

حضرت انس بن مالک رضی اللہ عنہ سے روایت ہے، انہوں نے کہا کہ ایک دفعہ مدینہ طیبہ میں گھبراہٹ پیدا ہوئی تو نبی صلی اللہ علیہ وسلم حضرت طلحہ رضی اللہ عنہ کے گھوڑے پر سوار ہوئے اور فرمایا: ”ہمیں تو خوف و ہراس کی کوئی چیز نظر نہیں آئی، البتہ ہم نے اس گھوڑے کو سمندر پایا ہے۔“ [صحيح البخاري/كتاب الجهاد والسير/حدیث: 6212]