حضرت ابوہریرہ رضی اللہ عنہ سے روایت ہے، انہوں نے کہا کہ رسول اللہ صلی اللہ علیہ وسلم نے فرمایا: ”تم لوگوں کو یہ قبیلہ قریش ہلاک کر دے گا۔“ صحابہ کرام رضی اللہ عنہم نے عرض کیا: ایسے حالات میں ہمارے لیے کیا حکم ہے؟ آپ صلی اللہ علیہ وسلم نے فرمایا: ”کاش! اس وقت لوگ ان سے الگ رہیں۔“ شعبہ کے ایک دوسرے طریق میں ابوالتیاح کی ابوزرعہ سے سماع کی تصریح ہے۔ [صحيح البخاري/كتاب المناقب/حدیث: 3604]

حضرت ابوہریرہ رضی اللہ عنہ سے روایت ہے، انہوں نے کہا کہ میں نے صادق ومصدوق صلی اللہ علیہ وسلم کو یہ فرماتے ہوئے سنا: ”میری امت کی ہلاکت قریش کے چند لڑکوں کے ہاتھوں ہوگی۔“ مروان نے ازراہ تعجب کہا: نوجوانوں کے ہاتھوں سے؟ حضرت ابوہریرہ رضی اللہ عنہ نے کہا: اگر تو چاہتا ہے تو میں ان کے نام ذکر کیے دیتا ہوں: وہ فلاں فلاں کے بیٹے ہوں گے۔ [صحيح البخاري/كتاب المناقب/حدیث: 3605]

حضرت عمرو بن یحییٰ بن سعید سے روایت ہے، انہوں نے کہا: مجھے میرے دادا نے بتایا کہ ”میں مدینہ طیبہ میں نبی صلی اللہ علیہ وسلم کی مسجد میں حضرت ابو ہریرہ رضی اللہ عنہ کے ساتھ بیٹھا ہوا تھا اور ہمارے ساتھ مروان بھی تھا۔ حضرت ابو ہریرہ رضی اللہ عنہ نے کہا: میں نے صادق ومصدوق صلی اللہ علیہ وسلم کو فرماتے ہوئے سنا: ”میری امت کی تباہی قریش کے چند چھوکروں کے ہاتھوں سے ہوگی۔“ مروان نے کہا: ”ان پر اللہ کی لعنت ہو۔“ حضرت ابو ہریرہ رضی اللہ عنہ نے کہا: ”اگر میں ان کے خاندان سمیت ان کے نام بتانا چاہوں تو ان کی نشاندہی کر سکتا ہوں۔“ پھر جب بنو مروان شام کی حکومت پر قابض ہو گئے تو میں اپنے دادا کے ہمراہ ان کی طرف جاتا تھا، انہوں نے جب وہاں ان کے چھوکروں کو دیکھا تو کہا: ”شاید یہ انہی میں سے ہوں۔“ ہم نے کہا: ”ان کے متعلق تو آپ ہی بہتر جانتے ہیں۔““ [صحيح البخاري/كتاب المناقب/حدیث: 7058]