حضرت ابوعثمان نہدی رحمہ اللہ سے روایت ہے کہ رسول اللہ صلی اللہ علیہ وسلم نے حضرت عمرو بن عاص رضی اللہ عنہ کو غزوہ ذات السلاسل کے لیے امیر بنا کر روانہ کیا۔ حضرت عمرو بن عاص رضی اللہ عنہ کہتے ہیں کہ میں (واپسی پر) آپ صلی اللہ علیہ وسلم کی خدمت میں حاضر ہوا اور آپ سے عرض کی: ”آپ کو سب سے زیادہ عزیز کون شخص ہے؟“ آپ نے فرمایا: ”عائشہ (رضی اللہ عنہا)۔“ میں نے پوچھا: ”مردوں میں سے کون ہے؟“ آپ نے فرمایا: ”ان کے والد گرامی (حضرت ابوبکر صدیق رضی اللہ عنہ)۔“ میں نے پوچھا کہ ”اس کے بعد کون؟“ تو آپ نے فرمایا: ”عمر (رضی اللہ عنہ)۔“ اس طرح درجہ بدرجہ آپ نے کئی آدمیوں کے نام لیے۔ اس کے بعد میں خاموش ہو گیا، مبادا آپ صلی اللہ علیہ وسلم مجھے سب سے آخر میں کر دیں۔ [صحيح البخاري/كتاب المغازي/حدیث: 4358]

حضرت عمرو بن عاص رضی اللہ عنہ سے روایت ہے کہ نبی کریم صلی اللہ علیہ وسلم نے انہیں غزوہ ذات السلاسل میں امیر بنا کر بھیجا تھا۔ وہ کہتے ہیں کہ میں (واپس) آپ کے پاس آیا تو میں نے عرض کیا: ”سب لوگوں میں کون شخص آپ کو زیادہ محبوب ہے؟“ آپ نے فرمایا: ”عائشہ رضی اللہ عنہا۔“ میں نے عرض کیا: ”مردوں میں سے کون؟“ آپ نے فرمایا: ”ان کے والد گرامی۔“ میں نے پوچھا: ”پھر کون؟“ آپ نے فرمایا: ”پھر عمر بن خطاب رضی اللہ عنہ۔“ اسی طرح درجہ بدرجہ آپ نے کئی آدمیوں کے نام لیے۔ [صحيح البخاري/كتاب المغازي/حدیث: 3662]