حضرت عائشہ رضی اللہ عنہا سے روایت ہے کہ اللہ کے نبی صلی اللہ علیہ وسلم رات کی نماز میں اتنا طویل قیام کرتے کہ آپ کے پاؤں مبارک پھٹ جاتے۔ حضرت عائشہ رضی اللہ عنہا نے (ایک مرتبہ) عرض کیا: ”اللہ کے رسول! آپ اتنی زیادہ مشقت کیوں اٹھاتے ہیں، اللہ تعالیٰ نے تو آپ کی اگلی پچھلی تمام لغزشیں معاف کر دی ہیں؟“ آپ صلی اللہ علیہ وسلم نے جواب دیا: ”تو کیا پھر میں اللہ تعالیٰ کا شکر گزار بندہ بننا پسند نہ کروں؟“ آخری عمر میں جب آپ صلی اللہ علیہ وسلم کا جسم فربہ ہو گیا تو آپ صلی اللہ علیہ وسلم یہ نماز بیٹھ کر پڑھا کرتے تھے۔ جب رکوع کا وقت آتا تو کھڑے ہو کر کچھ قراءت فرماتے، پھر رکوع کرتے۔ [صحيح البخاري/كتاب تفسير القرآن/حدیث: 4837]

ام المؤمنین حضرت عائشہ رضی اللہ عنہا سے روایت ہے کہ انہوں نے رسول اللہ صلی اللہ علیہ وسلم کو نمازِ تہجد کبھی بیٹھ کر پڑھتے نہیں دیکھا، لیکن جب آپ صلی اللہ علیہ وسلم عمر رحضرت ہو گئے تو آپ صلی اللہ علیہ وسلم بیٹھ کر قراءت کرتے، پھر جب رکوع کرنا چاہتے تو کھڑے ہو کر تقریباً تیس چالیس آیات پڑھ کر رکوع فرماتے۔ [صحيح البخاري/كتاب تفسير القرآن/حدیث: 1118]

حضرت مغیرہ بن شعبہ رضی اللہ عنہ فرماتے ہیں کہ نبی صلی اللہ علیہ وسلم نماز (تہجد) میں اتنا قیام فرماتے کہ آپ کے دونوں پاؤں یا دونوں پنڈلیوں پر ورم آ جاتا اور جب آپ سے اس کے متعلق کہا جاتا تو آپ صلی اللہ علیہ وسلم فرماتے: ”کیا میں اللہ کا شکر گزار بندہ نہ بنوں؟“ [صحيح البخاري/كتاب تفسير القرآن/حدیث: 1130]

حضرت مغیرہ بن شعبہ رضی اللہ عنہ سے روایت ہے، انہوں نے کہا کہ نبی صلی اللہ علیہ وسلم نماز میں رات بھر کھڑے رہے یہاں تک کہ آپ کے دونوں پاؤں سوج گئے۔ آپ سے عرض کی گئی: ” ﴿اللہ تعالیٰ نے آپ کی اگلی پچھلی تمام خطائیں معاف کر دی ہیں﴾ [سورة الفتح: 2] (تو پھر اس قدر مشقت کیوں؟)“ رسول اللہ صلی اللہ علیہ وسلم نے فرمایا: ”کیا میں شکرگزار بندہ نہ بنوں؟“ [صحيح البخاري/كتاب تفسير القرآن/حدیث: 4836]

حضرت مغیرہ بن شعبہ رضی اللہ عنہ سے روایت ہے، انہوں نے کہا: نبی صلی اللہ علیہ وسلم اس قدر پڑھتے کہ آپ کے دونوں قدموں پر ورم آ جاتا، آپ سے کہا جاتا تو آپ صلی اللہ علیہ وسلم فرماتے: «أَفَلَا أَكُونُ عَبْدًا شَكُورًا» ”کیا میں شکر گزار بندہ نہ بنوں؟“ [صحيح البخاري/كتاب تفسير القرآن/حدیث: 6471]