حضرت ابن عباس رضی اللہ عنہ سے روایت ہے، انہوں نے فرمایا: ”میں نے اسے یعنی بریرہ رضی اللہ عنہا کے شوہر کو بحالت غلام دیکھا ہے۔“ [صحيح البخاري/كتاب الطلاق/حدیث: 5280]

حضرت ابن عباس رضی اللہ عنہما ہی سے روایت ہے، انہوں نے فرمایا: ”وہ یعنی حضرت بریرہ رضی اللہ عنہا کا شوہر مغیث تھا جو فلاں قبیلے کا غلام تھا۔ گویا میں اسے دیکھ رہا ہوں کہ وہ مدینہ طیبہ کے گلی کوچوں میں ان کے پیچھے روتا پھرتا ہے۔“ [صحيح البخاري/كتاب الطلاق/حدیث: 5281]

حضرت ابن عباس رضی اللہ عنہ سے ایک اور روایت ہے انہوں نے فرمایا: ”بریرہ رضی اللہ عنہا کا شوہر ایک سیاہ فام غلام تھا جسے مغیث کہا جاتا تھا وہ بنو فلاں کا غلام تھا۔ گویا میں اسے اب بھی دیکھ رہا ہوں کہ وہ مدینہ طیبہ کے راستوں میں حضرت بریرہ رضی اللہ عنہا کے پیچھے گھومتا پھرتا ہے۔“ [صحيح البخاري/كتاب الطلاق/حدیث: 5282]

حضرت ابن عباس رضی اللہ عنہ سے روایت ہے، حضرت بریرہ رضی اللہ عنہا کے شوہر غلام تھے جنہیں مغیث کہا جاتا تھا۔ گویا وہ منظر اب بھی میری آنکھوں کے سامنے ہے جب وہ حضرت بریرہ رضی اللہ عنہا کے پیچھے روتے ہوئے گھوم رہے تھے اور ان کے آنسو ان کی داڑھی پر بہہ رہے تھے۔ نبی صلی اللہ علیہ وسلم نے حضرت عباس رضی اللہ عنہ سے فرمایا: ”اے عباس! کیا تمہیں مغیث کی حضرت بریرہ سے محبت اور حضرت بریرہ کی مغیث سے نفرت پر حیرت نہیں؟“ آخر نبی صلی اللہ علیہ وسلم نے حضرت بریرہ رضی اللہ عنہا سے فرمایا: ”تم اب بھی مغیث کے متعلق فیصلہ بدل لو۔“ انہوں نے عرض کی، یا رسول اللہ! کیا آپ مجھے اس کا حکم فرما رہے ہیں؟ آپ صلی اللہ علیہ وسلم نے فرمایا: ”نہیں، میں صرف سفارش کر رہا ہوں۔“ اس پر حضرت بریرہ رضی اللہ عنہا نے کہا: ”مجھے مغیث کے پاس رہنے کی کوئی خواہش نہیں۔“ [صحيح البخاري/كتاب الطلاق/حدیث: 5283]