حضرت عبداللہ بن عمر رضی اللہ عنہما سے روایت ہے، انہوں نے کہا کہ رسول اللہ صلی اللہ علیہ وسلم نے فرمایا: ”یہودی لوگ جب تم میں سے کسی کو سلام کرتے ہیں تو «السَّامُ عَلَيْكَ» ”تم پر موت ہو“ کہتے ہیں، تم جواب میں یہی کہہ دیا کرو: «وَعَلَيْكَ» ”تم پر بھی یہی کچھ ہو۔““ [صحيح البخاري/كتاب استتابة المرتدين/حدیث: 6928]

حضرت عائشہ رضی اللہ عنہا سے روایت ہے انہوں نے کہا: کچھ یہودی نبی صلی اللہ علیہ وسلم کے پاس آئے اور انہوں نے کہا: «السَّامُ عَلَيْكُمْ» ”یعنی تم پر موت آئے۔“ حضرت عائشہ رضی اللہ عنہا نے ان کے جواب میں کہا: ”تم پر بھی موت آئے۔ تم پر اللہ کی لعنت ہو اور غضب نازل ہو۔“ یہ سن کر آپ صلی اللہ علیہ وسلم نے فرمایا: ”اے عائشہ! نرمی کرو، سختی اور بد زبانی سے اجتناب کرو۔“ حضرت عائشہ رضی اللہ عنہا نے کہا: ”آپ نے نہیں سنا کہ انہوں نے کیا کہا تھا؟“ آپ صلی اللہ علیہ وسلم نے فرمایا: ”میں نے انہیں جو جواب دیا وہ تم نے نہیں سنا؟ میں نے ان کی بات ان پر لوٹا دی تھی۔ ان کے متعلق میری بد دعا قبول ہوگی لیکن میرے حق میں ان کی بد زبانی قبول ہی نہیں ہوگی۔“ [صحيح البخاري/كتاب استتابة المرتدين/حدیث: 6030]

حضرت عبداللہ بن عمر رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جب یہودی تمہیں سلام کرتے ہیں تو ان میں سے کوئی «السَّامُ عَلَيْكَ» ”تم پر موت آئے“ ہی کہتا ہے، لہٰذا تم اس کے جواب میں صرف «وَعَلَيْكَ» کہو، یعنی ”تمہیں بھی ایسا ہی پیش آئے۔““ [صحيح البخاري/كتاب استتابة المرتدين/حدیث: 6257]

حضرت انس بن مالک رضی اللہ عنہ سے روایت ہے کہ نبی صلی اللہ علیہ وسلم نے فرمایا: ”جب اہل کتاب تمہیں سلام کہیں تو تم اس کے جواب میں صرف «وَعَلَيْكُمْ» ”وعلیکم“ کہو۔“ [صحيح البخاري/كتاب استتابة المرتدين/حدیث: 6258]

حضرت انس بن مالک رضی اللہ عنہ سے روایت ہے، انہوں نے کہا: ایک یہودی رسول اللہ صلی اللہ علیہ وسلم کے پاس سے گزرا تو اس نے کہا: ”تم پر ہلاکت ہو۔“ رسول اللہ صلی اللہ علیہ وسلم نے (اس کے جواب میں) فرمایا: ”تجھ پر بھی۔“ پھر رسول اللہ صلی اللہ علیہ وسلم نے (صحابہ کرام رضی اللہ عنہم سے) پوچھا: ”تمہیں معلوم ہے کہ اس نے کیا کہا تھا؟ اس نے «السَّامُ عَلَيْكَ» ”تم پر ہلاکت ہو“ کہا تھا۔“ صحابہ کرام رضی اللہ عنہم نے کہا: ”اللہ کے رسول! اسے ہم قتل نہ کر دیں؟“ آپ نے فرمایا: ”نہیں، جب تمہیں اہل کتاب سلام کہیں تو تم جواب میں یہ کہہ دیا کرو: «وَعَلَيْكُمْ» ”تم پر بھی۔““ [صحيح البخاري/كتاب استتابة المرتدين/حدیث: 6926]