جناب یزید بن نمران نے بیان کیا کہ میں نے تبوک میں ایک آدمی دیکھا جو لنجا تھا (یعنی چل پھر نہ سکتا تھا)۔ اس نے بتایا کہ میں نبی کریم صلی اللہ علیہ وسلم کے آگے سے گزرا تھا، میں گدھے پر سوار تھا اور آپ صلی اللہ علیہ وسلم نماز پڑھ رہے تھے۔ آپ صلی اللہ علیہ وسلم نے فرمایا: «اللَّهُمَّ اقْطَعْ أَثَرَهُ» ”اے اللہ! اس کے قدم کاٹ دے۔“ چنانچہ اس کے بعد سے میں اپنے قدموں پر نہیں چل سکا ہوں۔ [سنن ابي داود/تفرح أبواب ما يقطع الصلاة وما لا تقطعها /حدیث: 705]

سعید بن غزوان اپنے والد سے روایت کرتے ہیں کہ انہوں نے حج کو جاتے ہوئے تبوک میں پڑاؤ کیا۔ انہوں نے ایک لنجا آدمی دیکھا (جو چل نہ سکتا تھا)، انہوں نے اس کی کیفیت پوچھی تو اس نے کہا: ”میں تمہیں بتاتا ہوں مگر جب تک تجھے یہ معلوم رہے کہ میں زندہ ہوں کسی کو بتانا نہیں۔ رسول اللہ صلی اللہ علیہ وسلم تبوک میں ایک کھجور تلے پڑاؤ کیے ہوئے تھے، آپ صلی اللہ علیہ وسلم نے فرمایا: ”یہ ہمارا قبلہ ہے۔“ پھر آپ صلی اللہ علیہ وسلم اس کی طرف نماز پڑھنے لگے، چنانچہ میں بھاگتا ہوا آیا جبکہ میں لڑکا ہی تھا، حتیٰ کہ میں آپ صلی اللہ علیہ وسلم کے اور آپ صلی اللہ علیہ وسلم کے سترے کے درمیان میں سے گزر گیا۔ آپ صلی اللہ علیہ وسلم نے فرمایا: ”اس نے ہماری نماز توڑی، «قَطَعَ اللَّهُ أَثَرَهُ» ”اللہ اس کے قدم توڑ دے۔“”چنانچہ اس دن سے آج تک میں ان پر کھڑا نہیں ہو سکا ہوں۔“ [سنن ابي داود/تفرح أبواب ما يقطع الصلاة وما لا تقطعها /حدیث: 707]