حضرت ابوہریرہ رضی اللہ عنہ سے روایت ہے، انہوں نے فرمایا: ایک آدمی نبی صلی اللہ علیہ وسلم کی خدمت میں حاضر ہوا اور عرض کی: ”اللہ کے رسول صلی اللہ علیہ وسلم ! مجھے بتائیے کہ میرے حسن سلوک کا مستحق کون ہے؟“ آپ صلی اللہ علیہ وسلم نے فرمایا: ”ہاں! قسم ہے تیرے باپ (کے رب) کی! تجھے ضرور بتاؤں گا۔ تیری ماں (تیرے حسن سلوک کی سب سے زیادہ مستحق ہے)۔“ اس نے کہا: پھر کون؟ آپ صلی اللہ علیہ وسلم نے فرمایا: ”پھر تیری ماں۔“ اس نے کہا: پھر کون؟ آپ صلی اللہ علیہ وسلم نے فرمایا: ”پھر تیری ماں۔“ اس نے کہا: پھر کون؟ آپ صلی اللہ علیہ وسلم نے فرمایا: ”تیرا باپ۔“ اس نے کہا: اے اللہ کے رسول صلی اللہ علیہ وسلم ! مجھے میرے مال کے بارے میں بتائیے کہ میں اس میں سے کس طرح صدقہ کروں؟ آپ صلی اللہ علیہ وسلم نے فرمایا: ”ہاں! قسم ہے اللہ کی! تجھے ضرور بتاؤں گا۔ (وہ اس طرح ہے کہ) تو اس وقت صدقہ کرے جب تو تندرست ہو اور مال سے محبت رکھتا ہو، تجھے زندہ رہنے کی امید ہو اور فقر کا اندیشہ ہو۔ (یہ صدقہ کا صحیح وقت ہے) اور اسے مؤخر نہ کرنا حتی کہ جب تیری جان یہاں (حلق تک) پہنچ جائے، پھر تو کہے: میرا مال فلاں کو دے دینا، میرا مال فلاں کو بھی دے دینا۔ وہ تو انہی کا ہو چکا، اگرچہ تجھے یہ (حقیقت) ناگوار محسوس ہو۔“ [سنن ابن ماجه/كتاب الوصايا/حدیث: 2706]

حضرت ابو ہریرہ رضی اللہ عنہ سے روایت ہے، انہوں نے کہا: عرض کیا گیا: ”اے اللہ کے رسول صلی اللہ علیہ وسلم ! میں کس سے نیکی کروں؟“ آپ صلی اللہ علیہ وسلم نے فرمایا: ”اپنی ماں سے۔“ پوچھنے والے نے کہا: ”اس کے بعد کس سے؟“ فرمایا: ”اپنی ماں سے۔“ اس نے کہا: ”اس کے بعد کس سے؟“ فرمایا: ”اپنے باپ سے۔“ اس نے کہا: ”اس کے بعد کس سے؟“ فرمایا: ”جو زیادہ قریبی (تعلق رکھتا) ہو، پھر جو (اس کے بعد) زیادہ قریبی ہو۔“ [سنن ابن ماجه/كتاب الوصايا/حدیث: 3658]